म्यादी बीमाबाट १ अर्ब ८८ करोड प्रिमियम संकलन

Citizen Life Insurance Co

काठमाडौं, वैशाख १७ । जीवन बीमा कम्पनीले वैदेशिक रोजगार (म्यादी) बीमाबाट १ अर्ब ८८ करोड प्रिमियम संकलन गरेका छन् । बीमा समितिले दिएको पछिल्लो तथ्यांकले यस्तो देखाएको हो ।

समितिले दिएको चालू आर्थिक वर्षको फागुन मसान्तसम्मको तथ्याङ्कअनुसार १८ लाख २६ हजार ९८ जनाले वैदेशिक रोजगार बीमा गरेका छन् ।फागुनमा मात्र ७३ हजार ८ सय ८ जनाले वैदेशिक रोजगार बीमा गरेको समितिले जानकरी दिएको छ ।

रोजगारका लागि विदेश जाने व्यक्तिले अनिवार्य रूपमा यो बीमा गर्नुपर्ने हुन्छ । यसकारण सङ्ख्यात्मक हिसाबमा अन्य जीवन बीमाभन्दा यसमा मानिसको सङ्ख्या बढी भएको समितिको भनाइ छ ।

कम्पनीहरूले माघ मसान्तसम्ममा वैदेशिक रोजगार बीमाबाट १ अर्ब ६३ करोड ४१ लाख रुपैयाँ प्रिमियम संकलन गरेका थिए । माघको तुलनामा अहिलेको प्रिमियम संकलन १५ दशमलव ०७ प्रतिशतले बढी हो ।

यस्तै, फागुन मसान्तसम्ममा अन्य जीवन बीमाबाट २६ अर्ब १९ करोड ३० लाख बीमाशुल्क आर्जन भएको देखिएको छ । समग्रमा चालू आवको फागुन मसान्तसम्ममा जीवन बीमा कम्पनीहरूले २८ अर्ब ७ करोड ३४ लाख बीमाशुल्क आर्जन गरेका छन् । माघ मसान्तसम्म कम्पनीहरूले २४ अर्ब ३८ करोड ३६ लाख बीमाशुल्क आर्जन गरेका थिए ।

सरकारले नै वैदेशिक रोजगारीमा जाँदा अनिवार्य बीमा गर्ने नीति लिएसँगै बीमा कम्पनीलाई वैदेशिक रोजगार क्रममा गरिने बीमाले प्रिमियम संकलनमा सघाउ पुर्याएको छ भने वैदेशिक रोजगारको क्रममा हुने जोखिमबाट पनि बीमितलाई रक्षा गर्दछ । तर, पछिल्ला दिनमा वैदेशिक रोजगारीमा जाने कामदारको संख्या घट्दै जाँदा बीमा कम्पनीहरुमा पनि यसको प्रभाव पर्ने गरेको देखिन्छ ।

प्रतिक्रिया दिनुहोस्

सम्बन्धित समाचार