काठमाडौं । सेञ्चुरी कमर्सियल बैंक लिमिटेड र आईएमई लाइफ इन्स्योरेन्स कम्पनी लिमिटेडबीच बैंकास्योरेन्सको सम्झौता भएको छ । सम्झौता अनुसार ग्राहकहरुले सेञ्चुरी बैंकबाट आईएमई लाइफ इन्स्योरेन्स कम्पनीको बीमा लेख प्राप्त गर्न, प्रिमियम भुक्तानी गर्न, दाबी भुक्तानी लगायत सम्पूर्ण बीमा सेवा प्राप्त गर्न सकिने छ ।
उक्त सम्झौता पत्रमा बैंकका कामु प्रमुख कार्यकारी अधिकृत जीवन भट्टराई र आईएमई लाइफ इन्स्योरेन्सका सहायक महाप्रबन्धक दिनेश अमात्यले हस्ताक्षर गरेका छन् ।
बैंक इस्योरेन्स सम्झौतापछि सर्वसाधारण तथा बैंकका ग्राहकले सेन्चुरी बैंक लिमिटेडको कुनै पनि शाखाबाट छिटो छरितो र सहज रूपमा आईएमईलाइफ इन्स्योरेन्स कम्पनी लिमिटेडको जीवनबिमा गराउनका साथै जीवन बिमासम्बन्धी जानकारी प्राप्त गर्न सक्ने पनि विज्ञप्तिमा उल्लेख छ । बैंकले हाल १११ स्थानबाट कारोबार सञ्चालन गरिरहेको छ ।
आईएमई लाइफ इन्स्योरेन्स कम्पनी लिमिटेडले हाल मुलुक भरका ५० स्थानबाट विभिन्न शाखा-उप शाखामार्फत सेवा प्रदान गर्दै आएको छ भने कम्पनीले अहिले विभिन्न किसिमका १० वटा बिमा योजनाहरू बजारमा ल्याएको छ ।
कम्पनीले सामान्य सावधिक,आईएमई बालशिक्षा, आईएमई आजीवन, नगद र्फिता, साढे तीन गुणा रक्षावरणलगायतका बिमा योजना ल्याएको छ । आईएमईलाइफ इन्स्योरेन्स कम्पनी लिमिटेडको मुख्य उद्देश्य न्यून आय भएका सहरी तथा ग्रामीण भेगका व्यक्तिको समेत जीवन बिमामा पहुँच पुरयाई नेपालमा जीवन बिमा ब्यबसाय विस्तार गर्नु रहेको जनाएको छ ।
