काठमाडौं । नेपालको सबै भन्दा कान्छो जीवन बिमा कम्पनी ‘प्रभु लाइफ इन्स्योरेन्स’ लिमिटेडले गोंगबुमा आफ्नो नयाँ शाखा कार्यालयको शुभारम्भ गरी कारोबार सुरु गरेको छ । बीमा समितिका कार्यकारी अध्यक्ष-चिरञ्जीवी चापागाईले विहिवार एक कार्यक्रमकाबीच सो शाखाको शुभारम्भ गरे । यस अघि कम्पनीले देशभित्र बिभिन्न स्थानहरुमा रहेका १८ शाखा कार्यालयहरुबाट जीवन बीमा सेवा प्रदान गर्दै आईरहेको जनाएको छ ।
कार्यक्रममा बीमा समितिका कार्यकारी अध्यक्ष चापागाईले दश वर्षको अवधिमा अर्थतन्त्रमा धेरै परिवर्तन आएको बताउँदै बिमा ब्यबसायको सम्भाब्य बजार धेरै भएकाले थप नयाँ बीमा कम्पनीलाई अनुमति दिएको बताए । उनले नयाँ बीमा कम्पनी संचालनमा आउँदा थप रोजगारीका अवसरहरु सृजना हुने तथा बीमा बजारलाई समेत थप विस्तार गर्न सघाउ पुर्याउने कुरामा दुई मत नरहेको बिचार ब्यक्त गरे ।
कम्पनीका संचालक श्री मनीराम पोखरेलले जीवन बीमालाई गाउँसम्म पुर्याउने उदेश्यसहित कम्पनी स्थापना भएको बताउँदै बीमा बजारमा नयाँ आयाम थप्ने दाबी गरे । दुई अर्ब चुक्ता पूँजी रहेको प्रभु लाइफ इन्स्योरेन्स कम्पनीमा संस्थापक शेयरधनीले १ अर्ब ४० करोड लगानी गरेका छन् । कम्पनीले केही समय भित्रै साठी करोड रुपैयाँ बराबरको साधारण शेयर जारी गर्ने जनाएको छ ।
