काठमाडौं, वैशाख १२ । विनाशकारी भुकम्पको आज तीन वर्ष पुरा भएको छ । यो अवधिमा बीमा कम्पनीहरुले ८३ दशमलव १२ प्रतिशत दाबी भुक्तानी गरेका छन् ।
१६ निर्जीवन बीमा कम्पनीमा १६ अर्ब ६९ करोड ४८ लाख बराबरको दाबी परेकोमा चैत मसान्तसम्म १३ अर्ब ८७ करोड रुपैयाँको दाबी भुक्तानी भएको बीमा समितिले जनाएको छ ।
त्यस्तै दाबी परेको संख्याको आधारमा भने ९८ दशमलव ३२ प्रतिशत भुक्तान भएको तथ्यांकले देखाउँछ । कुल १७ हजार ८ सय दाबी परेकोमा तीन वर्षको अवधिमा १७ हजार ५ सय १ दाबी भुक्तानी भएको हो ।
एभरेष्ट र लुम्बिनीको शत प्रतिशत भुक्तानी
यो अवधिमा एभरेष्ट इन्स्योरेन्स र लुम्बिनी जनरल इन्स्योरेन्सले शत प्रतिशत दाबी भुक्तानी गरेका छन् । १६२ दाबी संख्याको १४ करोड ८ लाख रुपैयाँको दाबी परेको एभरेष्ट इन्स्योरेन्सले सबै दाबी भुक्तान गरेको हो । त्यस्तै २५ करोड ४४ लाख रुपैयाँको ८८० दाबी परेको लुम्बिनी जनरल इन्स्योरेन्सले पनि सबै दाबी भुक्तान गरिसकेको देखिन्छ ।
