निक्षेप संकलन तथा कर्जा प्रवाहमा उल्लेख्य सुधार

Citizen Life Insurance Co

काठमाडौं, वैशाख ९ । बैंकिङ र वित्तीय संस्थामा चालू आर्थिक वर्षभरी नै लगानी योग्य पूँजी तरलता अभाव भयो । यद्यपी यो अवधिमा पनि बैंकहरुले उल्लेख्य मात्रामा निक्षेप र कर्जामा वृद्धि गरेको देखिएको छ ।

बैंक तथा वित्तीय संस्थाले सार्वजानिक गरेको चालू आर्थिक वर्षको तेस्रो त्रैमासिक प्रतिवेदनमा बैंकहरुले निक्षेप संकलन र कर्जा लगानीमा वृद्धि गरेको देखिएको हो । हालसम्म विवरण पस्केका एनआईसी एसिया बैंक, सानिमा बैंक, एभरेष्ट बैंक, सिद्धार्थ बैंक र सिटीजन बैंक इन्टरनेसनलको निक्षेप संकलन र कर्जा प्रवाहमा राम्रो वृद्धि देखिएको हो ।

तरलता अभावका कारण निक्षेपमा तानातान जस्तै देखिएको यो अवधिमा बैंकहरुले निक्षेप संकलन र कर्जा प्रवाहमा वृद्धि गरेसँगै व्यवसायमा पनि वृद्धि गरी नाफा बढाएका छन् ।

यो अवधिमा एनआईसी एसिया बैंकले सबैभन्दा बढी निक्षेप संकलन गरी कर्जा पनि गतवर्षको तुलनामा उच्च अंकले बढाएको छ । निक्षेप संकलनमा लागि निकै आक्रामक रुपले प्रस्तुत भएको एनआईसी एसियाको नाफा भने यो अवधिमा १८ प्रतिशतले घटेको छ । बैंकले निक्षेप संकलनमा ६९ प्रतिशतले बढाउँदा कर्जा लगानी ५९ प्रतिशतभन्दा बढीले वृद्धि गरेको छ ।

त्यस्तै २७ प्रतिशतले नाफा बढाएको सानिमा बैंकले पनि यो अवधिमा निक्षेप संकलनसँगै कर्जा पनि बिस्तार गरेको देखिएको छ । यो अवधिमा बैंकले ३३ प्रतिशतले निक्षेप संकलन बढाएर कर्जा लगानी पनि सोही अनुपातमा बढाएको छ । १ अर्ब ८० करोडभन्दा बढी मुनाफा कमाएको एभरेष्ट बैंकले पनि निक्षेप संकलन १५ प्रतिशतले बढाएर १ खर्बभन्दा बढी पुर्याएको छ ।

त्यसैगरी सिद्धार्थ बैंकले पनि ९० अर्बभन्दा बढी निक्षेप संकलन गरेर ७९ अर्बभन्दा बढी कर्जा प्रवाह गरेको छ । बैंकको निक्षेप संकलन गतवर्षभन्दा २० प्रतिशतले बढी हो भने कर्जा प्रवाह पनि सोही अनुपातले बढाएको देखिन्छ ।

सिटीजन बैंक इन्टरनेसनलको भने निक्षेप संकलनको तुलनामा कर्जा प्रवाह दोब्बरले वृद्धि भएको देखिएको छ । यसभन्दा अघिल्ला दुई त्रैमासमा मुनाफा घटेको विवरण पस्केको यो बैंकले चालू आर्थिक वर्षको तेस्रो त्रैमास ६० अर्ब २५ करोड निक्षेप संकलन गरेर ५५ अर्ब ८२ करोड कर्जा लगानी गरेको छ ।

प्रतिक्रिया दिनुहोस्

सम्बन्धित समाचार