नेप्सेमा उच्च अंकको वृद्धि, बीमा समूहमा उछाल

Citizen Life Insurance Co

काठमाडौं, वैशाख ४ । मंगलबार शेयर बजार परिसुचक नेप्सेमा उच्च अंकको वृद्धि देखिएको छ । आज बजार ३३ दशमलव ६१ अंकले बढेर १ हजार ३ सय ३१ दशमलव १८ को बिन्दुमा पुगेको छ ।

नेप्से परिसुचक ३३ अंकले बढ्दा बीमा समूहमा भने उछाल नै आएको छ । यसदिन कारोबारमा आएका दश समूहमध्ये बीमा समूह ३६० दशमलव ४३ अंकले बढेको छ । त्यसैगरी उच्च कारोबार हुनेमा पनि अधिकांश बीमा कम्पनीहरु नै रहेका छन् ।

आज सबैभन्दा बढी सुर्या लाईफ इन्स्योरेन्सको ५ करोड ९८ लाख रुपैयाँको शेयर किनबेच भएको छ । त्यस्तै नेपाल लाईफ इन्स्योरेन्सको ३ करोडभन्दा बढी रुपैयाँको शेयर कारोबार भएको छ ।

त्यसैगरी लुम्बिनी जनरल इन्स्योरेन्स, प्रिमियर इन्स्योरेन्स, नेशनल लाईफ इन्स्योरेन्स, नेपाल इन्स्योरेन्स र नेको इन्स्योरेन्सको पनि २ करोडभन्दा बढी रुपैयाँको शेयर खरिदबिक्री भएको छ ।

कारोबार रकम अर्ब नजिक

परिसुचकसँगै आज कारोबार रकम पनि अर्ब नजिक पुगेको छ । मंगलबार १६६ कम्पनीको ९५ करोड ४० लाख ६ हजार ५०४ रुपैयाँको १८ लाख ९५ हजार ५०६ कित्ता शेयर किनबेच भएका छन् । कारोबार रकम सोमबारको तुलनामा ३८ करोडले बढी हो ।

१३ कम्पनीका लगानीकर्ताले गुमाए

उच्च अंकले बजार उकालो लाग्दा १३ कम्पनीका लगानीकर्ता भने सामान्य नोक्सानीमा रहेका छन् । जसमध्ये सहयोगी विकास बैंकको सबैभन्दा बढी ४ दशमलव ५ प्रतिशतले शेयर मूल्य घटेको छ । त्यसैगरी, विशाल बजार कम्पनी, ग्लोबल आइएमई समुन्नत स्किम-१, मिसन डेभलपमेन्ट बैंक, हाम्रो विकास बैंक, श्री इन्भेष्टमेन्ट बैंकलगातयका कम्पनीको शेयर भाउ केही घटेको छ ।

त्यस्तै १५३ कम्पनीको शेयर मूल्य भने बढेको छ । जसमध्ये महिला सहयात्रा माइक्रोफाइनान्स, राष्ट्रिय बीमा कम्पनीको संस्थापक शेयर, ग्लोबल आईएमई लघुवित्तको शेयर मूल्य १० प्रतिशतले बढेको छ ।

प्रतिक्रिया दिनुहोस्

सम्बन्धित समाचार