रसुवागढी हाइड्रो पावर र सान्जेन जलविद्युत कम्पनीमा आवेदन दिएका सञ्चयकर्ता तथा कर्मचारीको सेयर बाँडफाँड एकै पटक गरिने भएको छ । कर्मचारी सञ्चय कोषमा रकम जम्मा गर्ने सञ्चयकर्ताको सेयर आवेदन लगत संकलनमा समय लागेकाले एकै पटक बाँडफाँड गर्न लागिएको हो । करिब साढे ५ लाख सञ्चयकर्ताका लागि पहिलो चरणमा सेयर निष्कासन गरिएको थियो । सञ्चयकर्ताका लागि फागुन ११ देखि ३० गतेसम्म आवेदन दिने समय तोकिएको थियो । सि–आस्बा प्रणालीबाट भरिएको आवेदन संकलनमा समय लाग्दा अझै बाँडफाँड भएको छैन ।
दुवै कम्पनीले दोस्रो चरणमा संस्थापक (नेपाल विद्युत प्राधिकरण, चिलिमे जलविद्युत कम्पनी तथा स्थानीय संघ–संस्था) र ऋणदाता संस्थाका कर्मचारीका लागि चैत ५ गतेदेखि खुला गरेको थियो । कर्मचारीका लागि एक दिन (मंगलबार, चैत १३ गते) सम्म सेयरका लागि आवेदन दिन पाउँछन् । आवेदन दिने समय सकिएपछि एकै पटक दुवै चरणको सेयर बाँडफाँड गर्ने रसुवागढीका प्रमुख कार्यकारी अधिकृत माधवप्रसाद कोइरालाले बताए । ‘मंगलबारसम्म क्ल्यिरिङ एजेन्ट सिडिएसले विवरण संकलन गत समय दिने को छ,’ उनले भने, ‘ बाँडफाँड कहिले गर्ने भन्ने दिन तोकिएको छैन, तर शुक्रबारसम्म दुवै चरणको सकिन्छ ।
सोमबार साँझसम्म रसुवागढीमा संस्थापक संस्थाका ८ हजार ५५ जनाले सेयर किन्न आवेदन दिएका छन् । उनीहरूबाट ३९ करोड ६४ लाख ४३ हजार रुपैयाँ संकलन भएको छ । सञ्चय कोषका ५ सय ६७ जनाले आवेदन दिएका छन् । यसबाट ७ करोड १५ लाख ९ हजार रुपैयाँ संकलन भएको छ । यसेगरी, पछिल्लो विवरणअनुसार सान्जेनमा संस्थापक संस्थाका ६ हजार ९ सय २७ कर्मचारीले आवेदन दिएका छन् । यसबाट २० करोड ५६ लाख ५० हजार रुपैयाँ संकलन भएको छ । यस्तै, ५ सय ३ जना कोषका कर्मचारीले दिएको आवेदनबाट ३ करोड ४२ लाख ७७ हजार रुपैयाँ संकलन भएको छ ।
