काठमाडौं । समता घरेलु लघुवित्त वित्तीय संस्था लिमिटेडको एफपीओ बाँडफाँड भएको छ। लघुवित्तको शेयर निष्काशन तथा बिक्री प्रबन्धक मुक्तिनाथ क्यापिटलको कार्यालयमा आज एफपीओ बाँडफाँड भएको हो।
एफपीओमा कुल १३ लाख ४८ हजार ९१२ आवेदकमार्फत १ करोड ९६ लाख ९६ हजार १८० कित्ता शेयरका लागि आवेदन परेको थियो। जसमध्ये १ हजार ३९९ आवेदन रद्द भएका छन् भने १३ लाख ४७ हजार ५१३ आवेदन स्वीकृत भएको थियो । सोही अनुसार एफपीओ बाँडफाँड भएको हो ।
मागभन्दा बढी आवेदन परेकाले उक्त एफपीओ गोलाप्रथाको माध्यमबाट शेयर बाँडफाँड गरिएको हो । जसअनुसार ३५ हजार ९० जना आवेदकले १० कित्ताका दरले शेयर पाएका छन् । बाँडफाँडमा बाँकि रहेको ४.२५ कित्ता शेयर १ कित्ताका दरले ४ जनालाई र ०.२५ कित्ता एक जनालाई बाँडफाँड गरिएको क्यापिटलले जनाएको छ।
लघुवित्तले कात्तिक १२ गतेदेखि २० गतेसम्म ३ करोड ५० लाख ९० हजार ४२५ रुपैयाँ बराबरको प्रतिकित्ता १०० रुपैयाँ अंकित मूल्यका ३ लाख ५० हजार ९०४.२५ कित्ता शेयर निष्काशन गरेको थियो।
