काठमाडौं । प्रत्यक्ष वैदेशिक लगानी भित्र्याउनका लागि सरकारले नीतिगत सुधारको प्रयास जारी राखेपनि लगानीको प्रतिबद्धता यस वर्ष पनि खासै उत्साहप्रद हुन सकेको छैन ।
उद्योग विभागका अनुसार चालू आवको असोज मसान्तसम्मको लगानीको प्रतिबद्धत गत आवको तुलनामा घटेको छ। गत आव २०८०।८१ को असोज मसान्तसम्म १६ अर्ब ६० करोडको लगानी प्रतिबद्धता प्राप्त भएकोमा चालू आवको सो अवधिमा १६ अर्ब ४४ लाख रूपैयाँमा सीमित हुन पुगेको छ।
विभागका अनुसार गत असोजमा स्वचालित प्रणालीबाट २१ उद्योगमार्फत १५ करोड १० लाख रुपैयाँ लगानीको प्रतिबद्धता प्राप्त भएको छ । यसैगरी लगानीकर्ताको प्रतिनिधिको भौतिक उपस्थितिका माध्यमबाट हुने म्यानुअल प्रणालीबाट ३४ वटा उद्योगमार्फत ३ अर्ब ३० करोड ५३ लाख रूपैयाँ वैदेशिक लगानीको प्रतिबद्धता प्राप्त भएको छ। गत आर्थिक वर्षमा कुल ६१ अर्ब ९० करोड ४५ लाख रूपैयाँ विदेशी लगानी प्रतिबद्धता आएको थियो ।
राजनीतिक अस्थिरता र सार्वभौम रेटिङको अभावमा पछिल्ला वर्षहरूमा जलविद्युत उत्पादन र पर्यटन सेवा क्षेत्र बाहेक अन्य क्षेत्रमा नेपालले उल्लेख्य वैदेशिक लगानी आकर्षित गर्न सकेको छैन ।
