काठमाडाैं । दुई महिनाकाे अवधिमा विदेशी लगानीकर्ताले नेपालबाट १ अर्ब ९ करोड रुपैयाँ बढी रकम नेपालबाट फिर्ता लैजान सिफारिश लिएका छन् । नेपालमा गरेकाे लगानीकाे प्रतिफल र सलामी दस्तुरवापत विदेशी लगानीकर्ताले चालू आर्थिक वर्षकाे साउन र भदाै महिनामा फिर्ता लैजान उद्याेग विभागबाट स्वीकृती लिएका हुन् ।
विदेशी लगानीकर्ताले ६० करोड ६१ लाख ११ हजार नेपाली रुपैयाँ, ३ लाख ६ हजार अमेरिकी डलर र १२ करोड २९ लाख भारतीय रुपैयाँ सलामी दस्तुर (रोयल्टी) वापतकाे रकम लैजानका सिफारिश लिएका हुन् । नेपालमा उद्याेग व्यवसाय स्थापनका लागी हस्तान्तरण गरेकाे प्रविधि, ब्राण्ड नामलगायतकाे प्रयाेगवापत प्रयाेग भएकाे अवधि वा उत्पादनकाे परिमाण वा काराेबारकाे रकमकाे आधारमा विदेशी लगानीकर्ताले सलामी दस्तुर लिंदै आएका छन् । सलामी दस्तुर लैजानेमा केएफसी, काेकाकाेला, पेप्सी, टुबाेर्ग, एशियन पेन्टस्, डाबर, बर्जर पेण्टस् लगायतका कम्पनीहरू छन् । यसै अवधिमा २५ करोड रुपैयाँ बराबरको लाभांसका लागि सिफारिश दिएको हो ।
विभागकाे सिफारिशकाे आधारमा सम्बद्ध कम्पनीले नेपाल राष्ट्र बैंकमा निवेदन दिएर विदेशी मुद्रामा लगानीमा प्रतिफल र राेयल्टीवापतकाे रकम फिर्ता लैजानका लागी अन्तिम स्वीकृती लिनुपर्नेछ। नेपालमा कर सम्बन्धी दायीत्व भुक्तानी गर्न बाँकी रहेकाे अवस्थामा राष्ट्र बैंकले रकम फिर्ता लैजान राेक लगाउन समेत सक्छ।
