काठमाडौं । कर्जा प्रवाहले गति लिन नसक्दा बैंक तथा वित्तीय संस्थाहरुमा निक्षेप थुप्रिएको छ। अधिक तरलता ह्वात्तै बढेपछि नेपाल राष्ट्र बैंकले लगातार निक्षेप संकलन उपकरण प्रयोग गरेर बैंकिङ प्रणालीबाट पैसा खिचिरहेको छ।
चालु आर्थिक वर्षको पुस २ गतेसम्म केन्द्रीय बैंकले अधिक तरलता व्यवस्थापन गर्न बैंकिङबाट पैसा खिच्न ४० पटक निक्षेप संकलन उपकरण प्रयोग गरिसकेको छ। यो अवधिमा राष्ट्र बैंकले बैंकिङ प्रणालीबाट २२ खर्ब १५ अर्ब रुपैयाँ खिच्न खोजेको थियो। तर, बैंकहरुले १५ खर्ब ४ अर्ब ८० करोड रुपैयाँमात्रै दिन तयार भए।
यी ४० वटा निक्षेप संकलन उपकरणको औसत ब्याजदर ३ प्रतिशतभन्दा मुनि रहेका छन्। अर्थात बैंकहरुले ३ प्रतिशतभन्दा कम ब्याजदरमै केन्द्रीय बैंकमा पैसा राख्न मन्जुर भएको देखिन्छ।
राष्ट्र बैंकको पछिल्लो तथ्यांकअनुसार बैंक तथा वित्तीय संस्थाहरुको कुल निक्षेप ६७ खर्ब रुपैयाँ नजिक पुगेको छ भने कर्जा प्रवाह ५३ खर्ब ८७ अर्ब रुपैयाँ रहेको छ। बैंकहरुको औसत सीडी रेसियो ८० प्रतिशतभन्दा तल नै रहेको छ।
