काठमाडौं । गत असोजको दोस्रो साताको वर्षाले देशभर सिर्जना भएको बाढीपहिरोको वितन्डाले ठूलो जनधनको क्षति भएको छ। बाढीपहिरोका कारण भएको क्षतिको बीमा दाबी पनि निर्जीवन बीमा कम्पनीहरुमा हालसम्म पौने १३ अर्ब ७८ रुपैयाँ बढीको परेको छ।
नेपाल बीमा प्राधिकरणका अनुसार माघ २३ गतेसम्म १४ निर्जीवन बीमक र ४ वटा लघु निर्जीवन बीमा ३ हजार ७२० वटा दाबी परेका छन्। ती दाबीको कम्पनीहरुले १२ अर्ब ७८ करोड २४ लाख रुपैयाँ बढी भुक्तानी गर्नुपर्ने भएको छ। हालसम्म बीमकहरुले २ हजार २४९ वटा दाबीको २ अर्ब ५० करोड २० लाख रुपैयाँ भुक्तानी गरेका छन्।
प्राधिकरणका अनुसार सबैभन्दा बढी दाबी सम्पत्ति बीमामा परेको छ। सम्पत्ति बीमामा १ हजार ७९२ वटा दाबीको ९ अर्ब २० करोड ८४ लाख रुपैयाँ कम्पनीहरुले भुक्तानी गर्नुपर्ने देखिएको छ। हालसम्म सम्पत्ति बीमातर्फ कम्पनीहरुले १ हजार १७ वटा दाबीको १ अर्ब ८७ करोड ४६ लाख रुपैयाँ भुक्तानी गरिसकेका छन्।
यसैगरी दोस्रो धेरै इन्जिनियरिङ तथा ठेकेदार जोखिमतर्फ ३२४ वटा दाबीको कम्पनीहरुले २ अर्ब ७३ करोड ६९ लाख रुपैयाँ भुक्तानी गर्नुपर्ने देखिएको छ। हालसम्म कम्पनीहरुले १११ वटा दाबीको १५ करोड ५ लाख रुपैयाँमात्रै भुक्तानी गरेका छन्।
मोटर बीमा (निजी)तर्फ ९५८ वटा र मोटर बीमा (सार्वजनिक)तर्फ ३९६ वटा दाबी परेको छ। कम्पनीहरुले ती दाबीको क्रमशः ४२ करोड ४१ लाख रुपैयाँ र ३१ करोड ३१ लाख रुपैयाँ भुक्तानी गर्नुपर्ने देखिएको छ। हालसम्म मोटर बीमा (निजी)तर्फ ६५५ वटा दाबीको २१ करोड १४ लाख रुपैयाँ र मोटर बीमा (सार्वजनिक)तर्फ २५८ वटा दाबीको २२ करोड ३९ लाख रुपैयाँ कम्पनीहरुले भुक्तानी गरिसकेका छन्।
त्यस्तै सामुद्रिक बीमातर्फ कम्पनीहरुमा २४ वटा दाबी (४ करोड १२ लाख रुपैयाँ), पशुपन्छी बीमातर्फ ६८ दाबी (३ करोड ९३ लाख रुपैयाँ), कृषि बाली बीमातर्फ १३७ वटा दाबी (१ करोड रुपैयाँ) र विविधतर्फ २१ वटा दाबी (९१ लाख ६६ हजार रुपैयाँ) परेका छन्। हालसम्म कम्पनीहरुले सामुद्रिक बीमातर्फ १६ वटा दाबीको १ करोड ७८ हजार रुपैयाँ, पशुपन्छी बीमातर्फ ५० वटा दाबीको १ करोड ३ लाख ६६ हजार रुपैयाँ, कृषि बीमातर्फ १२५ वटा दाबीको ८२ लाख ९९ हजार रुपैयाँ र विविधतर्फ १७ वटाको ४९ लाख ५६ हजार रुपैयाँ भुक्तानी गरेका छन्।
