नेपाल स्टक एक्सेञ्जमा सुचिकृत १५ निर्जीवन बीमा कम्पनी मध्ये आर्थिक वर्ष ७५/७६ र आर्थिक वर्ष ७४/७५को तेश्रो त्रैमासलाई तुलना गर्दा कम्पनीहरुको खुद नाफा १४ प्रतिशतले वृद्धि भएको छ ।
सबैभन्दा धेरै नेपाल इन्स्योरेन्सको खुद नाफामा वृद्धि देखिएको छ। नेपाल इन्स्योरेन्सको खुद नाफा ९१ प्रतिशतले वृद्धि भएको छ। नेपाल इन्स्योरेन्सले चालु आर्थिक वर्षको तेश्रो त्रैमाससम्म १३ करोड ६ लाख खुद नाफा गरेको छ भने गत आर्थिक वर्षको तेश्रो त्रैमासकाे साेही अविधमा कम्पनीले ६ करोड ८२ लाख खुद नाफा गरेको थियो ।
निर्जीवन बीमाको लिडर शिखर इन्स्योरेन्सको खुद नाफामा ८ प्रतिशतको मात्र वृद्धि देखिएको छ। शिखर इन्स्योरेन्सले चालु आर्थिक वर्षको तेश्रो त्रैमासमा ३३ करोड ६६ लाख खुद नाफा गरेको छ भने अघिल्लो आर्थिक वर्षको साेही अविधमा ३१ करोड १ लाख खुद नाफा गरेको थियो ।
यूनाईटेड इन्स्योरेन्सको खुद नाफामा भने १८ प्रतिशतको गिरावट देखिएको छ। कम्पनीले चालु आर्थिक वर्षको तेश्रो त्रैमासमा ७ करोड ५५ लाख खुद नाफा गरेको छ भने अघिल्लो आर्थिक वर्षको तेश्रो त्रैमासमा ९ करोड १९ लाख खुद नाफा गरेको थियो ।
