काठमाडौं । नेपालमा सञ्चालित २० वाणिज्य बैंकहरुले चालु आर्थिक वर्षको ५ महिना मंसिरसम्म २८ अर्ब ३६ करोड रुपैयाँ खुद नाफा गर्न सफल भएका छन्।
नेपाल राष्ट्र बैंकले सार्वजनिक गरेको मासिक तथ्यांकअनुसार वाणिज्य बैंकहरुमध्ये नबिल बैंकले सर्वाधिक २ अर्ब ९६ करोड रुपैयाँ खुद नाफा गर्न सफल भएको छ। दोस्रोमा ग्लोबल आइएमई बैंकले २ अर्ब ७३ करोड रुपैयाँ खुद नाफा कमाएको छ।
तेस्रोमा नेपाल इन्भेस्टमेन्ट मेगा बैंकले २ अर्ब ६० करोड रुपैयाँ नाफा गर्दा चौथोमा प्राइम कमर्सियल बैंकले १ अर्ब ९२ करोड रुपैयाँ खुद नाफा आर्जन गरेको छ।
मंसिर महिनासम्म सबै वाणिज्य बैंकहरु नाफामा छन्। ६ वाणिज्य बैंकको नाफा १ अर्ब रुपैयाँभन्दा मुनि रहेको छ। लक्ष्मी सनराइज बैंक, माछापुच्छ्रे बैंक, सिटिजन्स बैंक, नेपाल एसबिआई बैंक, सिद्धार्थ बैंक र कृषि विकास बैंकको नाफा १ अर्ब रुपैयाँभन्दा तल छ। २० वाणिज्य बैंकमध्ये कृषि विकास बैंकको नाफा सबैभन्दा कम १२ करोड ५० लाख रुपैयाँमात्रै रहेको छ।
२० वाणिज्य बैंकको मंसिर मसान्तसम्म औसत नाफा १ अर्ब ४१ करोड रुपैयाँ रहेकोमा ८ वाणिज्य बैंकहरुले औसतभन्दा माथि नाफा गर्न सफल भएका छन्। औसतभन्दा माथि नाफा गर्ने बैंकमा नबिल बैंक, ग्लोबल आइएमई बैंक, नेपाल इन्भेस्टमेन्ट मेगा बैंक, प्राइम कमर्सियल बैंक, एनआईसी एसिया बैंक, हिमालयन बैंक, प्रभु बैंक र एनएमबि बैंक रहेका छन्।
