काठमाडौं । कर्जाको माग बढ्न नसक्दा बैंकिङ प्रणालीमा पैसा थुप्रिएको छ। तरलता व्यवस्थापन गर्न नेपाल राष्ट्र बैंकले बैंकिङ प्रणालीबाट लगातार पैसा तानिरहेको छ।
चालु आर्थिक वर्षको साउनयता केन्द्रीय बैंकले १७ पटक निक्षेप संकलन उपकरण प्रयोग गरेर बैंकिङ प्रणालीबाट पैसा तानेको छ। तर, राष्ट्र बैंकले तान्न खोजेजति पैसा बैंकहरुले दिन नचाहेको देखिन्छ।
साउनयता राष्ट्र बैंकले निक्षेप संकलन उपकरण प्रयोग गरेर ८ खर्ब ६५ अर्ब रुपैयाँ बैंकिङ प्रणालीबाट तान्न खोजेको थियो। तर, राष्ट्र बैंकले ५ अर्ब ५० अर्ब रुपैयाँमात्रै खिचेको छ। जुन कुल तान्न खोजेको रकमको ६३.६४ प्रतिशतमात्रै हो।
निक्षेप संकलन उपकरणको बोलकबोल गर्दा राष्ट्र बैंकले दिने औसत ब्याजदर ३ प्रतिशतभन्दा तल रहेको छ। बैंकहरुले सस्तोमै पैसा दिन नचाहेकै कारण राष्ट्र बैंकले आफूले तान्न खोजेजति रकम खिच्न नसकेको जानकारहरु बताउँछन्।
