काठमाडौं । राष्ट्र उत्थान लघुवित्त वित्तीय संस्थाले ऋणीको परिवारलाई बीमा बापतको रकम हस्तान्तरण गरेको छ । सो लघुवित्तमा वित्तीय कारोबार गर्दै आएकी यदुमाया दर्लामी पुडासैनीको मृत्यु पश्चात म्यादी बीमा रकम एक लाख ५० हजार रुपैयाँ परिवारका सदस्यहरुलाई हस्तान्तरण गरिएको हो ।
गत साता एक कार्यक्रमका बीच सो रकम मृतका श्रीमान श्रीराम पुडासैनीलाई हस्तान्तरण गरिएको राष्ट्र उत्थान लघुवित्त कम्पनीका चार नम्वर एरिया सुपरिवेक्षक उत्तम कुमार कार्कीले जानकारी दिए । राष्ट्र उत्थान लघुवित्त हेटौडा शाखाका प्रमुख नवराज घिमिरेले बीमा गरिएकै कारण पीडित परिवारले राहत पाएको तथा लघु वित्त कम्पनीको जोखिम न्यूनिकरण भएको बताए ।
खेती किसानी पेशामा आबद्ध मकवानपुरको चौघडा निवासी यदुमाया दर्लामी पुडासैनीको गत मंसिर २७ गते क्यान्सर रोगका कारण मृत्यु भयो । राष्ट्र उत्थान लघुवित्त हेटौडा शाखा अन्तर्गत ०४२ नम्वरमा सदस्यता लिएर दर्लामी वित्तीय कारोवार गर्दै आएकी थिईन् । खेती किसानी गर्नकै लागि हेटौडामा रहेको राष्ट्र उत्थान लघुवित्तबाट डेढ लाख रुपैयाँ ऋण लिएर व्यवसाय गर्दै आएकोमा उनको निधनसँगै अब उक्त ऋण कसले तिर्ने भन्ने अर्को अन्योलता थपियो ।
लघुवित्त कम्पनीले रिलायबल लाईफ इन्स्योरेन्समार्फत लघुबीमा कार्यक्रम अन्तर्गत ऋणीको ऋण रकम बराबरको म्यादी बीमा गराएको थियो । एक लाख ५० हजार रुपैयाँ ऋण लिएकोमा ६० हजार तिर्न बाँकी छदै दर्लामीको क्यान्सरबाट मृत्यु भएकोमा उनका आश्रित परिवारलाई म्यादी बीमा रकमले राहत दिएकोछ । ऋण डुब्न नदिन लघु बीमा अन्तर्गतको म्यादी बीमा कार्यक्रम लागू गरिएकोले उनको आश्रित परिवारले ऋण तिरेर बाँकी रहेको रकम पाएका छन् ।
