काठमाडौं । बीमा समितिले लकडाउन अवधीभरका लागि अनलाईनबाटै बीमा लेख जारी गर्नसक्ने नयाँ व्यवस्था गरेको छ । बीमा समितिका कार्यकारी निर्देशक राजुरमण पौडेलले सबै बीमा कम्पनीहरुलाई आज एक निर्देशन जारी गर्दै नन मेडिकल लिमिटभित्रका बीमालेखहरु अनलाईनबाटै जारी गर्न सकिने व्यवस्था गरेको हो । त्यसको लागि लघुबीमा निर्देशिका बमोजिम हुने गरी अधिकतम तीन लाख रुपैयाँ सम्मको बीमालेख अनलाईनबाट जारी गर्न सकिने व्यवस्था गरिएको छ ।
समितिले जारी गरेको निर्देशन बमोजिम बीमालेख प्रस्ताव फारम अनलाईनबाटै भर्न सकिने तथा केवाईसी फारम समेत अनलाईनबाटै भर्न सकिने व्यवस्था गरिएको छ । बीमा समितिले लकडाउन अवधीमा लागि अनलाईनबाटै जारी गरिएका बीमालेखहरु लकडाउन खुलेपछि टिकट टाँसिएको औपचारिक बीमालेख उपलब्ध गराउनुपर्ने जनाएको छ ।
यस्तो सुविधापछि अब अभिकर्ताहरुले बीमितलाई अनलाईनबाटै फारम भराएर बीमा गराई डिजिटल भुक्तानीका माध्यमबाट बीमा शुल्क भुक्तानी गरी जीवन बीमा सम्बन्धी सम्पूर्ण प्रक्रिया पूरा गर्न सक्नेछन् ।
