काठमाडौं । पूर्वी साउदी अरबको एक विमानस्थल र तेल सुविधामा भएको आक्रमणमा तीनजनाको मृत्यु भएको छ भने १० जना घाइते भएका छन्।
बुधबार राति दम्माम सहरको किङ फहद अन्तर्राष्ट्रिय विमानस्थलमा भएको आक्रमणमा एकजनाको मृत्यु भएको छ भने ८ जना घाइते भएका छन्। साउदी नागरिक उड्डयन प्राधिकरणले एक विज्ञप्तिमा आक्रमणमा ८ जना घाइते भएको जनाएको छ।
अधिकारीहरुले आक्रमण कसले गरेको हो भनेर बताएका छैनन् तर यमनका हुथी विद्रोहीहरुले हालैका दिनहरुमा साउदी विमानस्थलहरुलाई बारम्बार लक्षित गरेका छन्।
यद्यपि, इरान समर्थित हुथीहरुले आक्रमणको बारेमा अहिलेसम्म कुनै टिप्पणी गरेका छैनन्। साउदी नागरिक उड्डयन प्राधिकरणले एक विज्ञप्तिमा घाइतेहरुलाई सामान्यदेखि गम्भीर चोटपटक लागेको र विमानस्थलमा भएको भौतिक क्षतिको मूल्यांकन भइरहेको बताएको छ।
बुधबारअघि साउदी अरबको ऊर्जा मन्त्रालयले रिपोर्ट गरेको थियो कि खसालिएको ड्रोनको भग्नावशेष साउदी अरामकोको शायबा तेल क्षेत्रमा खस्दा दुईजनाको मृत्यु भएको छ र एक भारतीयसहित दुईजना घाइते भएका छन्। मन्त्रालयले मृतकहरुमा एक नेपाली र एक फिलिपिनी नागरिक रहेको बताएको छ। घाइतेहरुमा एक भारतीय र एक पाकिस्तानी नागरिक पनि छन्।
मन्त्रालयको विज्ञप्तिमा भनिएको छ कि भग्नावशेष खस्दा शायबा तेल क्षेत्रमा ठेकेदारको गाडीमा पनि आगो लागेको छ। यमनमा वैधता पुनस्र्थापित गर्न खोजिरहेको साउदी नेतृत्वको गठबन्धनले सात ड्रोन खसालेको दाबी गरेको छ। गठबन्धनका प्रवक्ता मेजर जनरल तुर्की अल–मलिकीले एक्समा एक पोस्टमा भने कि साउदी अरेबियालाई लक्षित गरी राखिएका चार ड्रोनहरु रोकेर नष्ट गरिएको थियो। उनले दोस्रो पोस्टमा थपे कि यी ड्रोनहरु साउदी अरेबियाको पूर्वी प्रान्त र मदिना क्षेत्रमा रोकिएको थियो।
अल–मलिकीले पछि थपे कि पूर्वी प्रान्तमा अर्को ड्रोन पनि रोकिएको थियो। बुधबार साँझ गठबन्धनले दक्षिणी क्षेत्रलाई लक्षित गरी राखिएको छैटौँ हुथी ड्रोन र पूर्वी प्रान्तलाई लक्षित गरी राखिएको सातौं ड्रोनलाई रोकेको जनाएको छ। –एजेन्सी
