काठमाडौं । बैंकहरुमा ठूलो रेन्ज अर्थात १ करोड रुपैयाँभन्दा माथिको शेयर धितो कर्जाको माग बढी देखिएको छ।
नेपाल राष्ट्र बैंकले सार्वजनिक गरेको तथ्यांकअनुसार गत आर्थिक वर्ष २०८२।८३ को असार मसान्तसम्मको तथ्यांकले यस्तो देखाएको हो। पछिल्लो एक वर्षको अवधिमा शेयर बजारमा लगानीकर्ताहरुले शेयर धितो राखेर थप २५ अर्ब ८० करोड रुपैयाँ लगानी गरेका छन्।
तथ्यांकअनुसार गत आर्थिक वर्षको असार मसान्तसम्म बैंकहरुबाट १ खर्ब ६६ अर्ब ५० करोड ७९ लाख रुपैयाँ शेयर धितो कर्जा गएको छ। अघिल्लो आर्थिक वर्ष २०८१।८२ को असारसम्म बैंकहरुबाट १ खर्ब ४० अर्ब ७० करोड २१ लाख रुपैयाँ कर्जा गएको थियो। यो हिसाबले अघिल्लो वर्षको तुलनामा समीक्षा वर्षमा बैंकहरुबाट शेयर धितो कर्जा १८.३ प्रतिशतले बढेको छ।
गत आर्थिक वर्षको असारसम्म बैंकहरुबाट १ करोड रुपैयाँ माथिको रेन्जको कर्जा १ खर्ब १९ अर्ब ४५ करोड ४७ लाख रुपैयाँ शेयर धितो कर्जा गएको छ। अघिल्लो वर्ष असारसम्म यो रेन्जको कर्जा ९८ अर्ब ९२ करोड ७९ लाख रुपैयाँ गएको थियो। यो रेन्जको कर्जाको माग २०.७ प्रतिशतले बढेको छ।
समीक्षा अवधिसम्म बैंकहरुबाट ५० लाख रुपैयाँ माथि १ करोड रुपैयाँसम्मको रेन्जको कर्जा १९ अर्ब १५ करोड ३९ लाख रुपैयाँ, २५ लाख रुपैयाँदेखि ५० लाख रुपैयाँसम्मको रेन्जको कर्जा १८ अर्ब ८५ करोड ४९ लाख रुपैयाँ र २५ लाख रुपैयाँसम्मको रेन्जको कर्जा ९ अर्ब ४ करोड ४४ लाख रुपैयाँ गएको छ। अघिल्लो वर्ष असारसम्म बैंकहरुबाट ५० लाख रुपैयाँ माथि १ करोड रुपैयाँसम्मको रेन्जको कर्जा १६ अर्ब २ करोड ९७ लाख रुपैयाँ, २५ लाख रुपैयाँदेखि ५० लाख रुपैयाँसम्मको रेन्जको कर्जा १७ अर्ब ५६ करोड ६१ लाख रुपैयाँ र २५ लाख रुपैयाँसम्मको रेन्जको कर्जा ८ अर्ब १७ करोड ८४ लाख रुपैयाँ गएको थियो।
अघिल्लो वर्षको तुलनामा समीक्षा अवधिमा ५० लाख रुपैयाँ माथि १ करोड रुपैयाँसम्मको रेन्जको कर्जा १९.५ प्रतिशत, २५ लाख रुपैयाँदेखि ५० लाख रुपैयाँसम्मको रेन्जको कर्जा ७.३ प्रतिशत र २५ लाख रुपैयाँसम्मको रेन्जको कर्जा भने १०.६ प्रतिशतले बढेको छ।
