काठमाडौं । अमेरिकी विदेशमन्त्री मार्को रुबियोले ‘बर्थ टुरिजम’विरुद्ध कडा कारबाहीको घोषणा गर्दै अमेरिकी नागरिकता बिक्रीका लागि नभएको स्पष्ट पारेका छन्। विदेश विभागले एक महिनाभित्र यस नेटवर्कमा संलग्न ६०० भन्दा बढी व्यक्तिको भिसा रद्द गरेको छ। विदेश विभाग, गृह सुरक्षा विभाग र अन्य एजेन्सीले संयुक्त रुपमा बर्थ टुरिजम रोकथाम कार्यदल गठन गरेका छन्।
भिसा ठगी, नक्कली कागजात र बर्थ टुरिजमको सञ्जाल हटाउन यो कारबाही भइरहेको छ। रुबियोको भनाइलगत्तै ट्रम्पको गोल्ड कार्ड कार्यक्रमका बारेमा सामाजिक सञ्जालमा बहस सुरु भएको छ।
मार्को रुबियोले सामाजिक सञ्जाल प्लेटफर्म एक्समा लेखेका छन्, ‘विदेशी नागरिकलाई नक्कली कागजात र भिसा प्रशिक्षणमार्फत बच्चाहरुलाई नागरिकता प्रदान गर्ने नेटवर्कले नाफा कमाइरहेका छन्। विदेश विभागको कार्यदलले भिसाधारकहरुको गतिविधि र यात्रा इतिहासको गहन अनुसन्धान गरिरहेको स्पष्ट पारेको छ। अमेरिकी नागरिकताको अखण्डताको रक्षा गर्न यो सञ्जाललाई पूर्ण रूपमा ध्वस्त पारिनेछ।’
ट्रम्पको ‘गोल्ड कार्ड’
ट्रम्प प्रशासनको ‘गोल्ड कार्ड’ कार्यक्रमलाई उद्धृत गर्दै नागरिकता बिक्रीका लागि होइन भन्ने रुबियोको दाबीको जबाफ दिन एक्समा ‘कम्युनिटी नोट’ थपियो। यस नोटअनुसार १० लाखदेखि २० लाख डलरसम्म योगदान गर्ने विदेशी नागरिकलाई अमेरिकी बसोबास र नागरिकताको बाटो प्रस्ताव गरिएको छ। यद्यपि, यो कार्यक्रमले प्रत्यक्ष रुपमा नागरिकता बेच्दैन। बरु स्थायी बसोबास र नागरिकताको कानुनी बाटो प्रदान गर्दछ।
बर्थ टुरिजम भनेको के हो ?
ट्रम्प प्रशासनको परिभाषाअनुसार केवल बच्चा जन्माउने उद्देश्यले गैरआप्रवासी भिसामा अमेरिका यात्रा गर्नुलाई बर्थ टुरिजम मानिन्छ। यो कारबाही अगस्ट ६ मा जारी गरिएको कार्यकारी आदेशअन्तर्गत गरिएको छ।
सन् १८६८ मा अनुमोदन गरिएको अमेरिकी संविधानको १४ औं संशोधनले अमेरिकामा जन्मेका सबैलाई नागरिकता प्रदान गर्दछ। –एजेन्सी
