काठमाडौं । जीवन बीमालेखको अवधि पूरा नहुँदै बीमितले बीमालेख बन्द गर्ने अप्रिय निर्णय लिनुपर्दा बीमितमात्र नभएर बीमकलाई पनि असहज हुन्छ। बीमा अवधि पूरा नहुँदै बीमा कोषको रकमबाट बीमितलाई भुक्तानी दिनुपर्दा बीमित र बीमक दुवैलाई घाटा हुन्छ।
समयावधि पूरा नहुँदै जीवन बीमालेख बन्द गर्नुपर्ने अवस्था न बीमितले न त बीमकले नै अपेक्षा गरेका हुन्छन् । बीमकले बीमालेख बिक्रीबापत अभिकर्तालाई दिएको कमिसन, नियामकीय दस्तुर, व्यवस्थापन खर्चलगायतका खर्चका कारण समयअगावै रकम भुक्तानी गर्दा बीमकले यस्तो खर्च कटाएरमात्र भुक्तानी गर्नुपर्छ। यस्तो अवस्थामा बीमितले पाउने बोनस रकमभन्दा बीमकले कट्टा गर्ने रकम अधिक हुँदा आफूले भुक्तानी गरेको भन्दा पनि थोरै रकममात्र हात पर्छ।
बीमालेखको पूर्वनिर्धारित अवधि अर्थात परिपक्व मिति अगावै बीमालेख समर्पण हुने क्रमलाई न्यून गर्न बीमितका आवश्यकता पूरा गर्ने, विश्वास निर्माण गर्ने, पारदर्शिता सुनिश्चित गर्ने र नियमित सञ्चार कायम राख्ने रणनीतिहरु अपनाउनुपर्छ। बीमालेख समर्पणलाई न्यूनीकरण गर्नका लागि बीमक र अभिकर्ताका तर्फबाट गर्न सकिने प्रयासबारे यहाँ केही सुझाव समेटिएका छन्:
ग्राहकको आवश्यकता बुझ्ने र सम्बोधन गर्ने
बीमा शिक्षामा जोडः बीमालेखका फाइदाहरु, सर्तहरु र दीर्घकालीन मूल्य सरल तथा स्पष्ट रुपमा प्रदान गर्नुपर्छ।
व्यक्तिगत बीमालेखः ग्राहकको जीवनको चरण र वित्तीय लक्ष्यअनुसार बीमालेख डिजाइन गर्ने र सोहीअनुसारको बीमालेख खरिद गर्न प्रोत्साहित गर्नुपर्छ।
समस्या समाधानमा सक्रिय हुनुहोस्ः बीमितको गुनासोलाई शीघ्र र प्रभावकारी रुपमा सम्बोधन गर्नुपर्छ।
ग्राहकसँग नियमित सञ्चार
नियमित जानकारी प्रवाहः बीमालेखका फाइदा, अध्यावधिक विवरण र स्मरण पठाउन ई–मेल वा एसएमएस प्रयोग गर्नु उपयुक्त हुन्छ।
आवधिक समीक्षाः ग्राहकको जीवन परिस्थितिका आधारमा बीमालेखलाई अनुकूल बनाउन समीक्षा प्रस्ताव गर्नुपर्छ।
ग्राहक सेवा सुधारः ग्राहकको जिज्ञासालाई तुरुन्त सम्बोधन गर्ने सजिलो सेवा प्रणाली उपलब्ध गराउनुपर्छ।
विश्वास र पारदर्शिता निर्माण
स्पष्टताः बीमालेख दस्तावेजलाई सरल र बुझ्न सजिलो बनाउनुपर्छ।
दाबी प्रक्रिया सुधारः बीमा दाबी सजिलै र पारदर्शी रुपमा कार्यान्वयन गर्नुपर्छ।
जबरजस्ती बिक्री नगर्नेः ग्राहकको वास्तविक आवश्यकता बुझेरमात्र बीमालेख रोज्न सुझाव दिनुपर्छ।
लचिलोपन प्रदान
बीमाशुल्क भुक्तानीमा लचिलोपनः बीमाशुल्क भुक्तानीका लागि उपलब्ध विभिन्न विकल्प वा मोहलत अवधि बारे अवगत गराउनुपर्छ।
बीमालेख परिमार्जन गर्ने सुविधाः जीवन परिवर्तन (जस्तैः विवाह, सन्तान जन्म, वा अवकाश) अनुसार बीमालेख परिमार्जनको सुविधा। यो सुविधा नेपाली बीमा बजारमा उपलब्ध छैन ।
बीमालेख स्थगन गर्ने विकल्पः छोटो अवधिको वित्तीय समस्याका बेला बीमालेखलाई अस्थायी रुपमा स्थगन गर्ने सुविधा। यस्तो सुविधा पनि नेपालमा उपलब्ध छैन।
ग्राहकलाई बीमालेख निरन्तरताका लागि प्रोत्साहन
निष्ठा पुरस्कारः लामो समय बीमालेख कायम राख्ने ग्राहकलाई छुट, बोनस वा अतिरिक्त फाइदाहरु उपलब्ध गराउनुहोस्। पछिल्लो समयमा केही जीवन बीमकले लोयल्टी बोनसको अवधारणा लागू गरेका छन् ।
नो–ल्याप्स फाइदाः बीमालेख व्यतित नगरेका बीमितलाई थप सुविधा वा बीमाशुल्क भुक्तानीमा केही सहुलियत वा अन्य कुनै छुट प्रदान गर्नुहोस्।
रेफरल कार्यक्रमः नयाँ ग्राहक ल्याउने बीमितलाई पुरस्कार प्रदान गर्नुहोस्।
प्रविधिको प्रयोग
डिजिटल उपकरणहरुः मोबाइल एप्स र अनलाइन पोर्टलमार्फत बीमाशुल्क भुक्तानी गर्न, पुनजागरण गर्न सहज बनाउनुहोस्।
डेटा एनालिटिक्सः ग्राहकको व्यवहारको विश्लेषण गरेर बीमालेख बन्द गर्ने वा अन्य प्रकारका जोखिम पहिचान गर्नुहोस्।
व्यक्तिगत सूचना पठाउनेः बीमाशुल्क भुक्तानी मिति, बीमालेख अवधि, वा फाइदाहरुका बारेमा सूचना दिनुहोस्।
ग्राहकबाट प्रत्यक्ष प्रतिक्रिया लिने
पृष्ठपोषण लिनुहोस्ः बीमालेख बन्द गर्ने कारणहरु बुझ्नका लागि सर्वेक्षण वा अन्तर्वार्ता गर्नुहोस्।
एक्जिट इन्टरभ्युः बीमालेख समर्पण गर्ने बीमितसँग कुराकानी गरेर सुधारका उपाय पहिचान गर्नुहोस्।
दीर्घकालीन फाइदाहरु प्रवर्द्धन गर्ने
वित्तीय योजना मार्गदर्शनः बीमालाई दीर्घकालीन वित्तीय रणनीतिमा कसरी समाहित गर्न सकिन्छ भन्ने जानकारी दिनुहोस्।
उदाहरण प्रदर्शनः सफल केस स्टडी र सन्देशमार्फत बीमालेखको फाइदाहरु देखाउनुहोस्।
थप सेवा र बन्डलिङ प्रदान गर्नुहोस्
क्रस–सेलिङ अवसरहरुः विभिन्न प्रकारका बीमा (जस्तैः स्वास्थ्य, जीवन, र वाहन बीमा) बन्डलमा प्रस्ताव गर्नुहोस्।
राइडरहरु र थप सेवाः ग्राहकको आवश्यकताअनुसार बीमालेखमा अतिरिक्त जोखिम बहनको सुविधा दिनुहोस्।
अभिकर्ताको तालिममा ध्यान दिने
सहानुभूति र नैतिकताः बीमितको आवश्यकता र कल्याणलाई प्राथमिकता दिने तालिम दिनुहोस्।
बीमालेख निरन्तरताका मापनः अभिकर्ताको कार्यसम्पादन मूल्यांकन गर्दा बीमालेखको निरन्तरा भए नभएको पक्षलाई मुख्य सूचक बनाउनुहोस्।
यी उपायले बीमितलाई सन्तुष्ट र विश्वासिलो महसुस गराउँदै बीमालेखलाई असमयमै समर्पण हुने वा बन्द हुने अवस्थामा पुग्नबाट रोक्न सहयोग हुन सक्छ।
