काठमाडौं । जीवन बीमकले नयाँ व्यापारमा आकर्षक प्रगति देखिएको छ। नेपाल बीमा प्राधिकरणले सार्वजनिक गरेको गत आर्थिक वर्ष २०८२।८३ को तथ्यांकले यस्तो देखाएको हो।
तथ्यांकअनुसार हाल सञ्चालनमा रहेका १४ वटा जीवन बीमा कम्पनीले गत आर्थिक वर्षमा ४९ अर्ब ४० करोड ३३ लाख रुपैयाँ प्रथम बीमाशुल्क (नयाँ व्यापार) संकलन गरेका छन्। अघिल्लो वर्ष २०८१।८२ मा कम्पनीहरुले ४० अर्ब १७ करोड ६० लाख रुपैयाँ प्रथम बीमाशुल्क संकलन गरेका थिए। अघिल्लो वर्षको तुलनामा समीक्षा वर्षमा बीमकहरुको नयाँ व्यापार २२.९७ प्रतिशतले बढेको छ।
समीक्षा वर्षमा सर्वाधिक नयाँ व्यापार भित्र्याउनेमा नेपाल लाइफ रहेको छ भने वृद्धिदरका हिसाबले आइएमई लाइफ अगाडि रहेको छ। अघिल्लो वर्षको तुलनामा समीक्षा वर्षमा १३ वटा कम्पनीको नयाँ व्यापार बढेको छ भने एउटाको घटेको छ।
समीक्षा वर्षमा नेपाल लाइफले १३ अर्ब ७ करोड ९२ लाख रुपैयाँ प्रथम बीमाशुल्क संकलन गरेको छ। अघिल्लो वर्ष कम्पनीले १० अर्ब ४९ करोड ५१ लाख रुपैयाँ प्रथम बीमाशुल्क संकलन गरेको थियो। अघिल्लो वर्षको तुलनामा समीक्षा वर्षमा कम्पनीको नयाँ व्यापार २४.६२ प्रतिशतले बढेको छ।
दोस्रोमा नेसनल लाइफ रहेको छ। समीक्षा वर्षमा कम्पनीले ६ अर्ब ९४ करोड ५२ लाख रुपैयाँ प्रथम बीमाशुल्क संकलन गरेको छ। जुन अघिल्लो वर्षको तुलनामा १८.७३ प्रतिशतले बढेको हो। अघिल्लो वर्ष कम्पनीले ५ अर्ब ८४ करोड ९३ लाख रुपैयाँ प्रथम बीमाशुल्क संकलन गरेको थियो।
धेरै नयाँ व्यापार भित्र्याउने तेस्रो कम्पनीमा सूर्यज्योति रहेको छ। यो कम्पनीले अघिल्लो वर्ष ३ अर्ब ६ करोड ९१ लाख रुपैयाँ प्रथम बीमाशुल्क संकलन गरेकोमा समीक्षा वर्षमा २२.०४ प्रतिशतले बढेर ३ अर्ब ७४ करोड ५५ लाख रुपैयाँ पुगेको छ।
यसैगरी समीक्षा वर्षमा लाइफ इन्स्योरेन्स कर्पोरेसन नेपाल (एलआईसी नेपाल)ले ३ अर्ब ५३ करोड ७३ लाख रुपैयाँ, सिटिजन लाइफले ३ अर्ब १० करोड ७७ लाख रुपैयाँ, हिमालयन लाइफले २ अर्ब ९३ करोड २६ लाख रुपैयाँ, आइएमई लाइफले २ अर्ब ७७ करोड ४२ लाख रुपैयाँ र एसियन लाइफले २ अर्ब ७१ करोड ० लाख रुपैयाँबराबरको नयाँ व्यापार भित्र्र्याएका छन्। अघिल्लो वर्षको तुलनामा समीक्षा वर्षमा एलआईसी नेपालको नयाँ व्यापार १६.४३ प्रतिशत, सिटिजन लाइफको ४२.२७ प्रतिशत, हिमालयन लाइफको ४.६० प्रतिशत, आइएमई लाइफको ६४.९८ प्रतिशत र एसियन लाइफको २६.५२ प्रतिशतले बढेको छ।
गत आर्थिक वर्षमा सानिमा रिलायन्स लाइफले २ अर्ब ३३ करोड ५३ लाख रुपैयाँ, रिलायबल नेपाल लाइफले २ अर्ब २७ करोड ३८ लाख रुपैयाँ, प्रभु महालक्ष्मी लाइफले २ अर्ब १५ करोड २० लाख रुपैयाँ, मेट लाइफले १ अर्ब ६४ करोड ११ लाख रुपैयाँ, सन नेपाल लाइफले १ अर्ब ३७ करोड ६ लाख रुपैयाँ र राष्ट्रिय जीवन बीमा कम्पनीले ७९ करोड ७६ लाख रुपैयाँ प्रथम बीमाशुल्क संकलन गरेका छन्। अघिल्लो वर्षको तुलनामा समीक्षा वर्षमा नयाँ व्यापार सानिमा रिलायन्स लाइफको १९.८६ प्रतिशत, रिलायबल नेपाल लाइफको ३८.७४ प्रतिशत, प्रभु महालक्ष्मी लाइफको ३४.६१ प्रतिशत, मेट लाइफको १३.१७ प्रतिशत र सन नेपाल लाइफको १७.७४ प्रतिशतले बढेको छ भने राष्ट्रिय जीवन बीमा कम्पनीको २६.२६ प्रतिशतले घटेको छ।
