काठमाडौं । जीवन बीमकले नयाँ व्यापारमा आकर्षक प्रगति देखिएको छ। नेपाल बीमा प्राधिकरणले सार्वजनिक गरेको चालु आर्थिक वर्ष २०८२।८३ को ११ महिना (साउन–जेठ)सम्मको तथ्यांकले यस्तो देखाएको हो।
तथ्यांकअनुसार हाल सञ्चालनमा रहेका १४ वटा जीवन बीमा कम्पनीले चालु वर्षको जेठसम्म ३९ अर्ब ५९ करोड ४२ लाख रुपैयाँ प्रथम बीमाशुल्क (नयाँ व्यापार) संकलन गरेका छन्। अघिल्लो वर्ष २०८१।८२ को जेठसम्म कम्पनीहरुले ३१ अर्ब ३४ करोड ६४ लाख रुपैयाँ प्रथम बीमाशुल्क संकलन गरेका थिए। अघिल्लो वर्षको तुलनामा समीक्षा अवधिमा बीमकहरुको नयाँ व्यापार २६.३१ प्रतिशतले बढेको छ।
समीक्षा अवधिसम्म सर्वाधिक नयाँ व्यापार भित्र्याउनेमा नेपाल लाइफ रहेको छ भने वृद्धिदरका हिसाबले आइएमई लाइफ अगाडि रहेको छ। नयाँ व्यापार १४ वटै कम्पनीको बढेको छ।
चालु वर्षको जेठसम्म नेपाल लाइफले १० अर्ब १६ करोड ६८ लाख रुपैयाँ प्रथम बीमाशुल्क संकलन गरेको छ। अघिल्लो वर्ष यही अवधिसम्म कम्पनीले ७ अर्ब ९१ करोड १३ लाख रुपैयाँ प्रथम बीमाशुल्क संकलन गरेको थियो। अघिल्लो वर्षको तुलनामा समीक्षा अवधिमा कम्पनीको नयाँ व्यापार २८.५१ प्रतिशतले बढेको छ।
दोस्रोमा नेसनल लाइफ रहेको छ। समीक्षा अवधिसम्म कम्पनीले ५ अर्ब ६३ करोड ६५ लाख रुपैयाँ प्रथम बीमाशुल्क संकलन गरेको छ। अघिल्लो वर्ष यही अवधिसम्मको तुलनामा समीक्षा अवधिमा कम्पनीको नयाँ व्यापार १९.८४ प्रतिशतले बढेको छ। अघिल्लो वर्ष जेठसम्म कम्पनीले ४ अर्ब ७० करोड ३५ लाख रुपैयाँ प्रथम बीमाशुल्क संकलन गरेको थियो।
धेरै नयाँ व्यापार भित्र्याउने तेस्रो कम्पनीमा लाइफ इन्स्योरेन्स कर्पोरेसन नेपाल (एलआईसी नेपाल) रहेको छ। यो कम्पनीले अघिल्लो वर्ष जेठसम्म २ अर्ब ४१ करोड ६ लाख रुपैयाँ प्रथम बीमाशुल्क संकलन गरेकोमा समीक्षा अवधिसम्म २४.०२ प्रतिशतले बढेर २ अर्ब ९८ करोड ९६ लाख रुपैयाँ पुगेको छ।
यसैगरी समीक्षा अवधिसम्म सूर्यज्योति लाइफले २ अर्ब ८० करोड ५६ लाख रुपैयाँ, सिटिजन लाइफले २ अर्ब ४५ करोड २० लाख रुपैयाँ, आइएमई लाइफले २ अबृ २६ करोड ५६ लाख रुपैयाँ, हिमालयन लाइफले २ अर्ब २४ करोड ८३ लाख रुपैयाँ र एसियन लाइफले २ अर्ब १२ करोड १५ लाख रुपैयाँबराबरको नयाँ व्यापार भित्र्याएका छन्। अघिल्लो वर्षको तुलनामा समीक्षा अवधिमा सूर्यज्योति लाइफको नयाँ व्यापार १९.०५ प्रतिशत, सिटिजन लाइफको ४१.५४ प्रतिशत, आइएमई लाइफको ७९.१९ प्रतिशत, हिमालयन लाइफको ३.७३ प्रतिशत र एसियन लाइफको ३३.४५ प्रतिशतले बढेको छ।
चालु वर्षको जेठसम्म रिलायबल नेपाल लाइफले १ अर्ब ८३ करोड ७० लाख रुपैयाँ, सानिमा रिलायन्स लाइफले १ अर्ब ८२ करोड ३ लाख रुपैयाँ, प्रभु महालक्ष्मी लाइफले १ अर्ब ६० करोड ९० लाख रुपैयाँ, मेट लाइफले १ अर्ब ४४ करोड ५६ लाख रुपैयाँ, राष्ट्रिय जीवन बीमा कम्पनीले १ अर्ब ११ करोड ७० लाख रुपैयाँ र सन नेपाल लाइफले १ अर्ब ७ करोड ८७ लाख रुपैयाँ प्रथम बीमाशुल्क संकलन गरेका छन्। अघिल्लो वर्षको तुलनामा समीक्षा अवधिमा रिलायबल नेपाल लाइफको नयाँ व्यापार ३७.७० प्रतिशत, सानिमा रिलायन्स लाइफको २१.९८ प्रतिशत, प्रभु महालक्ष्मी लाइफको २९.३४ प्रतिशत, मेट लाइफको १४.८८ प्रतिशत, राष्ट्रिय जीवन बीमा कम्पनीको १६.४१ प्रतिशत र सन नेपाल लाइफको १७.०३ प्रतिशतले बढेको छ।
