काठमाडौं । अर्थमन्त्री डा स्वर्णिम वाग्लेले नेपाली इतिहासकै ठूलो वित्तीय अपराधमा संलग्न गिरोहबाट पालित पोषितबाट प्रधानमन्त्री र आफूमाथि आक्रमण भइरहेको बताएका छन्।
प्रतिनिधिसभाको अर्थ समितिमा बुधबार आयोजित बजेटसम्बन्धी छलफलमा अर्थमन्त्री वाग्लेले यस्तो धारणा राखेका हुन्। ‘प्रधानमन्त्रीज्यू र ममाथि नियोजित रुपमा घेराबन्दी र आक्रमण भइरहेको छ’, उनले भने, ‘नेपाली इतिहासकै ठूलो वित्तीय अपराधमा संलग्नहरुमाथि सरकारले छानबिन गरिरहेको छ । केही दिनमा यो विषय अदालत पुग्दैछ । हामीसँग रुष्ट तिनै समूहबाट पालित पोसितबाट प्रधानमन्त्री र ममाथि आक्रमण भइरहेको मलाई शंका लागेको छ।’
सार्वभौम संसदका माननीयहरु पनि यस्तो समूहका कुराहरुबाट प्रभावित नहुन वाग्लेले आग्रह गरे। संसदको गरिमा लहलहैमा लागेर कमजोर पार्न नहुने उनको भनाइ थियो।
