काठमाडौं । पछिल्लो एक वर्षको तथ्यांक हेर्ने हो भने जीवन बीमकको तुलनामा निर्जीवन बीमकहरुले आक्रामक ढंगले जनशक्ति बढाएका छन्।
नेपाल बीमा प्राधिकरणले सार्वजनिक गरेको तथ्यांकअनुसार चालु आर्थिक वर्ष २०८२।८३ को वैशाखसम्म निर्जीवन बीमकहरुमा ६ हजार २९२ कर्मचारी कार्यरत छन्। अघिल्लो वर्ष यही अवधिसम्म निर्जीवन बीमकहरुमा ६ हजार ७५ जना कार्यरत थिए। यस हिसाबले पछिल्लो एक वर्षको अवधिमा निर्जीवन बीमकहरुमा थप २१७ जनाले रोजगारी पाएका छन्।
पछिल्लो एक वर्षको अवधिमा निर्जीवन बीमकहरुको ३ वटा शाखा कार्यालय थपिएको छ। अघिल्लो वर्ष वैशाखसम्म निर्जीवन बीमकहरुको १ हजार १५१ वटा कार्यालय संख्या रहेकोमा समीक्षा अवधिसम्म बढेर १ हजार १५४ पुगेको छ।
उता जीवन बीमकहरुको कार्यालय संख्या भने घटेको छ। अघिल्लो वर्ष वैशाखसम्म जीवन बीमकहरुको कार्यालय संख्या १ हजार ८४७ वटा रहेकोमा समीक्षा अवधिसम्म घटेर १ हजार ८४० वटामा खुम्चिएको छ।
अघिल्लो वर्षको तुलनामा समीक्षा अवधिसम्म जीवन बीमकहरुमा कर्मचारी संख्या भने थोरै बढेर ६ हजार ९६ पुगेको छ। अघिल्लो वर्ष वैशाखसम्म जीवन बीमकहरुमा ६ हजार ८७ जना जना कार्यरत थिए। पछिल्लो एक वर्षको अवधिमा जीवन बीमकहरुमा ९ जना मात्र कर्मचारी थपिएका छन्।
