काठमाडौं । सानिमा म्युचुअल फन्डन्तर्गत सञ्चालित हुने सानिमा इक्विटी फन्ड–२ का इकाइहरुमा खरिद आवेदन दिने आज जेठ ४ गते अन्तिम दिन रहेको छ।
योजना व्यवस्थापक सानिमा क्यापिटलले गत वैशाख २४ गतेदेखि यस योजनाका १० रुपैयाँ अंकित दरमा कुल १ अर्ब रुपैयाँबराबरको १० करोड इकाइ बिक्री खुला गरेको थियो। लगानीकर्ताले यस योजनाका इकाइ खरिदका लागि आज बैंकिङ समयसम्म आवेदन दिन सक्नेछन्।
कुल इकाइमध्ये न्यूनतम १ करोड ३० लाख वा कुल बिक्री भएको इकाइ संख्याको न्यूनतम १३ प्रतिशत इकाइ कोष प्रवर्द्धक सानिमा बैंकलाई र २ प्रतिशतले हुन आउने २० लाख इकाइ योजना व्यवस्थापक सानिमा क्यापिटललाई सुरक्षित गरिएको छ। बाँकी ८ करोड ५० लाख इकाइमा लगानीकर्ताले आवेदन दिन सक्नेछन्।
यस योजनाका इकाइ खरिदका लागि नेपाल धितोपत्र बोर्डबाट अनुमति प्राप्त सी–आस्बा सेवामा सहभागी बैंक तथा वित्तीय संस्था र तिनका तोकिएका शाखाहरुसँगै सीडीएससीको मेरो शेयरबाट आवेदन दिन सकिनेछ।
यो १० वर्षे बन्दमुखी योजना हो।
