काठमाडौं । राष्ट्रिय स्वतन्त्र पार्टी (रास्वपा)का सभापति एवं प्रतिनिधिसभा सदस्य रवि लामिछानेले अब खाडी क्षेत्रमा जाने राजदूतहरु बिचौलियाको डिनर टेबलमा नभएर श्रमिकको शिविरमा भेटिने बताएका छन्।
निर्वाचनपछिको पहिलो प्रतिनिधिसभा बैठकमा आज वैदेशिक रोजगारमा रहेका नेपालीका विषयमा सम्बोधन गर्दै सभापति लामिछानेले यस्तो उद्घोष गरेका हुन्। ‘यो देशमा सधैँ तपाइँहरुले पठाएको रेमिट्यान्सको कुरा भयो तर आज म पैसाको कुरा गर्दिनँ’, उनले भने, ‘अब तपाइँले तिर्नुभएको मूल्यको कुरा गर्छु। परिवारबाट टाढा रहनुभयो। आमाबुवाको साथबाट अलगिनुभयो, कलिला छोराछोरीको साथ गुमाउनुभयो। चाडपर्व, गाउँघरको रमाइलो गुमाउनुभयो।’
आज यही सदनबाट आफूले क्षमायाचना गर्ने पनि लामिछानेले बताए। ‘यो देशले तपाइँको योग्यको सम्मान गरे। ‘अब तपाइँहरुको पीडा केवल कथा बन्ने छैन’, उनले भने, ‘नीति बन्नेछ, राज्यको प्राथमिकता बन्नेछ।’
त्यसैले अब बिचौलिया र श्रम माफिया कारबाहीको भागिदार बन्ने लामिछानेले घोषणा गरे। ‘अबको बजेटमा नीति तथा कार्यक्रम तपाइँको बन्ने छ’, उनले भने, ‘अब खाडी राष्ट्रमा जाने राजदूतहरु बिचौलियाको टेबलमा नभएर श्रमिकको शिविरमा भेटिनेछन्।’
