काठमाडौं । वैदेशिक रोजगारमा रहेका नेपालीले सोपान फर्मास्युटिकल्सको आइपीओ भर्ने आज चैत १२ गते अन्तिम दिन रहेको छ।
कम्पनीले पुँजी १ अर्ब ७१ करोड ६० लाख रुपैयाँको २५ प्रतिशतले हुन आउने ४२ करोड ९० लाख रुपैयाँबराबरको ४२ लाख ९० हजार कित्ता शेयर आइपीओ निष्कासन गर्ने अनुमति पाएको छ। त्यसमध्ये कम्पनीले पहिलो चरणमा १० प्रतिशतले हुन आउने ४ लाख २९ हजार कित्ता शेयर वैदेशिक रोजगारीमा रहेका नेपालीका लागि जारी गरेको छ। यो आइपीओमा वैदेशिक रोजगारमा रहेका नेपालीले आज बैंकिङ समयसम्म आवेदन दिन पाउने छन्।
दोस्रो चरणमा कम्पनीले ५ प्रतिशतले २ लाख १४ हजार ५०० कित्ता शेयर सामूहिक लगानी कोष र ४ प्रतिशतले हुन आउने १ लाख ७१ हजार ६०० कित्ता शेयर कम्पनीका कर्मचारीलाई छुट्याएर बाँकी ३४ लाख ७४ हजार ९०० कित्ता शेयर सर्वसाधारणका लागि बिक्री खुला गर्नेछ।
वैदेशिक रोजगारमा रहेका नेपालीले कम्पनीको आइपीओमा न्यूनतममा १० कित्ता र अधिकतममा ११ हजार कित्तासम्म आवेदन दिन सक्ने छन्। उनीहरुले वैदेशिक रोजगारीमा रहेका नेपालीले धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्था र तिनका तोकिएका शाखा कार्यालय तथा सीडीएससीको ‘मेरो शेयर’मार्फत आवेदन दिन सक्नेछन्।
यो कम्पनीको आइपीओ बिक्री प्रबन्धक एनएमबि क्यापिटल रहेको छ।
