काठमाडौं । निर्जीवन बीमकहरुले चालु आर्थिक वर्ष २०८२।८३ को फागुन महिनासम्म ३१ अर्ब ७० करोड रुपैयाँ बढीको व्यापार गर्न सफल भएका छन्।
नेपाल बीमा प्राधिकरणले सार्वजनिक गरेको चालु आर्थिक वर्षको फागुन महिनासम्मको तथ्यांकअनुसार १४ वटा निर्जीवन बीमकले १८ लाख ६२ हजार ११४ वटा बीमालेख जारी गरेर ३१ अर्ब ७० करोड २३ लाख रुपैयाँ कुल बीमाशुल्क आर्जन गरेका हुन्। अघिल्लो आर्थिक वर्ष २०८१।८२ को फागुनसम्म कम्पनीहरुले १८ लाख ४३ हजार ४५६ वटा बीमालेख जारी गरेर २८ अर्ब २ करोड ८८ लाख रुपैयाँ कुल बीमाशुल्क आर्जन गरेका थिए। अघिल्लो वर्षको तुलनामा समीक्षा अवधिमा कम्पनीहरुको व्यापार १३.११ प्रतिशतले बढेको छ।
अघिल्लो वर्षको तुलनामा चालु वर्षको फागुनमा १३ वटा बीमकको व्यापार बढेको छ भने एउटा बीमकको घटेको छ। फागुनसम्म शिखर इन्स्योरेन्सले सर्वाधिक व्यापार भित्र्याउँदा भने व्यापार वृद्धिको हिसाबले हिमालयन एरभेष्ट इन्स्योरेन्स अगाडि रहेको छ।
चालु आर्थिक वर्षको फागुनसम्म शिखर इन्स्योरेन्सले ४ अर्ब ३८ करोड ५४ लाख रुपैयाँ कुल बीमाशुल्क आर्जन गरेको छ। अघिल्लो वर्ष फागुनसम्म कम्पनीले ४ अर्ब १ करोड ३९ लाख रुपैयाँ कुल बीमाशुल्क आर्जन गरेको थियो। अघिल्लो वर्षको तुलनामा समीक्षा अवधिमा कम्पनीको व्यापार ९.२५ प्रतिशतले बढेको छ।
सगरमाथा लुम्बिनी इन्स्योरेन्स दोस्रो धेरै व्यापार भित्र्याउने कम्पनी बनेको छ। चालु वर्षको फागुनसम्म कम्पनीले ३ अर्ब ३६ करोड ८४ लाख रुपैयाँ कुल बीमाशुल्क आर्जन गरेको छ। अघिल्लो वर्ष फागुनसम्म कम्पनीले ३ अर्ब ३२ करोड ४४ लाख रुपैयाँ कुल बीमाशुल्क आर्जन गरेको थियो। अघिल्लो वर्षको कम्पनीको व्यापार १.३२ प्रतिशतले बढेको छ।
त्यस्तै तेस्रो धेरै व्यापार भित्र्याउनेमा हिमालयन एभरेष्ट इन्स्योरेन्स रहेको छ। चालु वर्षको फागुनसम्म यो कम्पनीले ३ अर्ब २० करोड ८५ लाख रुपैयाँ कुल बीमाशुल्क आर्जन गरेको छ। अघिल्लो वर्ष फागुनसम्म कम्पनीले २ अर्ब २१ करोड ५ लाख रुपैयाँ कुल बीमाशुल्क आर्जन गरेको थियो। अघिल्लो वर्षको तुलनामा चालु वर्षको फागुनसम्म कम्पनीको व्यापार ४५.१५ प्रतिशतले बढेको छ।
यसैगरी चालु वर्षको फागुनमा सिद्धार्थ प्रिमियर इन्स्योरेन्सले २ अर्ब ७९ करोड २१ लाख रुपैयाँ, आइजीआई प्रुडेन्सियल इन्स्योरेन्सले २ अर्ब ६८ करोड ४७ लाख रुपैयाँ, एनएलजी इन्स्योरेन्सले २ अर्ब ५३ करोड २५ लाख रुपैयाँ, नेको इन्स्योरेन्सले २ अर्ब ३९ करोड ५४ लाख रुपैयाँ र युनाइटेड अजोड इन्स्योरेन्सले १ अर्ब ९६ करोड २९ लाख रुपैयाँ कुल बीमाशुल्क संकलन गरेका छन्। अघिल्लो वर्षको यही अवधिसम्मको तुलनामा सिद्धार्थ प्रिमियर इन्स्योरेन्सको व्यापार १.३९ प्रतिशत, आइजीआई प्रुडेन्सियल इन्स्योरेन्सको १२.९९ प्रतिशत, एनएलजी इन्स्योरेन्सको ३६.२२ प्रतिशत, नेको इन्स्योरेन्सको ९.१४ प्रतिशत र युनाइटेड अजोड इन्स्योरेन्सको २२.७९ प्रतिशतले बढेको छ।
यसैगरी चालु वर्षको फागुनसम्म सानिमा जीआईजी इन्स्योरेन्सले १ अर्ब ७८ करोड ५९ लाख रुपैयाँ, नेपाल इन्स्योरेन्सले १ अर्ब ४९ करोड ६१ लाख रुपैयाँ, प्रभु इन्स्योरेन्सले १ अर्ब २१ करोड ४२ लाख रुपैयाँ, राष्ट्रिय बीमा कम्पनीले १ अर्ब ६ करोड ३३ लाख रुपैयाँ र नेसनल इन्स्योरेन्सले ८६ करोड ८७ लाख रुपैयाँ कुल बीमाशुल्क संकलन गरेका छन्। अघिल्लो वर्षको तुलनामा समीक्षा अवधिसम्म सानिमा जीआईसी इन्स्योरेन्सको व्यापार १३.६८ प्रतिशत, नेपाल इन्स्योरेन्सको ६.६९ प्रतिशत, प्रभु इन्स्योरेन्सको ४.५४ प्रतिशत र नेसनल इन्स्योरेन्सको १३.६० प्रतिशतले बढ्दा राष्ट्रिय बीमा कम्पनीको २.७९ प्रतिशतले घटेको छ।
