काठमाडौ । विश्वकै दोस्रो सबैभन्दा प्रदूषित सहरमा काठमाडौं परेको छ।
यो समाचार तयार गर्दासम्म वायु प्रदूषणको स्तर मापन गर्ने अन्तर्राष्ट्रिय संस्था ‘आईक्यू एयर’ तथ्यांकले यस्तो देखाएको हो। तथ्यांकअनुसार काठमाडौं विश्वकै सबैभन्दा बढी वायु प्रदूषण हुने सहरको सूचीमा दोस्रो स्थानमा रहेको छ।
काठमाडौंको वायु गुणस्तर सूचकांक १८६ एक्यूआई पुगेको छ। यो सूचकांक १५० भन्दा माथि नाघ्यो भने जनस्वास्थ्यका हिसाबले निकै अस्वस्थ मानिन्छ।
काठमाडौंको आकाशमा विषाक्त हावाले ढोकेको छ। यसले गर्दा मानिसमा आँखा पोल्ने र चिलाउने तथा सास फेर्न पनि असहज भएको छ। स्वास्थ्य मन्त्रालयले समेत अत्यावश्यक कामबाहेक घरबाहिर ननिस्कन अपिल गरिसकेको छ।
तथ्यांकअनुसार विश्वकै सबैभन्दा प्रदूषित सहरको सूचीमा भारतको दिल्ली पहिलो स्थानमा रहेको छ। दिल्लीमा अहिले २१४ एक्यूआई रहेको छ।
काठमाडौंपछि पाकिस्तानको लाहोर रहेको छ। लाहोरको एक्यूआई १६८ रहेको छ।
