काठमाडौं । प्रतिनिधिसभा सदस्य निर्वाचनको जारी मत गणनाले राष्ट्रिय स्वतन्त्र पार्टी (रास्वपा)ले अग्रता लिइरहेको छ।
पछिल्लो नतिजाले पुराना र ठूला दलभन्दा रास्वपामा जनलहर बढी देखिएको छ। अर्कोतर्फ काठमाडौंका महानगरपालिकाको मेयर पद छाडेर रास्वपाको वरिष्ठ नेता बनेका बालेन साहप्रति जनताले विश्वास गरेको देखिन्छ।
झापा क्षेत्र नं. ५ बाट बालेन साह नेकपा एमालेका अध्यक्ष केपी शर्मा ओलीसँग चुनाव लडिरहेको छ। त्यहाँको मत परिणाम पनि बालेनकै पक्षमा बढी देखिएको छ।
ताजा नतिजाअनुसार ६८ वटा निर्वाचन क्षेत्रमा मत गणना जारी छ। त्यसमध्ये रास्वपाका उम्मेदवार काठमाडौं १ र ८ र ललितपुर ३ मा विजयी भइसकेका छन्। काठमाडौं १ बाट रञ्जु दर्शना, काठमाडौं ८ बाट विराजभक्त श्रेष्ठ र ललितपुर ३ बाट तोसिमा कार्की विजयी भएका छन्।
अझै रास्वपाले ४८ वटा क्षेत्रमा अग्रता लिइरहेको छ।
उता नेपाल कांग्रेसले ८, एमालेले ४, नेकपाले ३, राप्रपाले १ र श्रम संस्कृति पार्टी १ क्षेत्रमा अग्रता लिइरहेका छन्।
