काठमाडौं । नेपाल राष्ट्र बैंकले लघुवित्त वित्तीय संस्थाले प्रवाह गर्न पाउने कर्जाको अधिकतम सीमा बढाएको छ।
केन्द्रीय बैंकले आज सार्वजनिक गरेको चालु आर्थिक वर्षको मौद्रिक नीतिको प्रथम त्रैमासिक समीक्षामार्फत लघुवित्त वित्तीय संस्थाले प्रवाह गर्न पाउने कर्जाको अधिकतम सीमा बढाएको हो। अब लघुवित्त वित्तीय संस्थाले अधिकतम १५ लाख रुपैयाँसम्म कर्जा प्रवाह गर्न पाउनेछन्।
यसअघि लघुवित्त वित्तीय संस्थाले अधिकतम ७ लाख रुपैयाँसम्म कर्जा प्रवाह गर्न पाउँथे।
लघुवित्त वित्तीय संस्थाबाट ऋण प्राप्त गरेका ऋणीहरुको कर्जा भुक्तानीमा पर्न गएको समस्यालाई ध्यानमा राखी कर्जा भुक्तानीको तालिका परिमार्जन गर्न सकिने व्यवस्था मिलाइनेछ।
यसैगरी बैंक तथा वित्तीय संस्थाले प्रदान गर्ने व्यक्तिगत अधिविकर्ष (पर्सनल ओभरड्राफ्ट) कर्जाको विद्यमान सीमा रु. ५० लाखबाट वृद्धि गरी रु. १ करोड कायम गरिनेछ।
