काठमाडौं । घरेलु बजारमा लामो समयसम्म आधिपत्य जमाएको वाईवाई चाउचाउको बजार खुम्चिन थालेपछि सिजी फुड्सले नयाँ ब्राण्ड ल्याउँदैछ। ‘सो यम’ ब्राण्डमा सीजी फुड्स नेपालले चाउचाउ, चिप्स, कर्न फ्लेक्स र ओट्स नेपाली उपभोक्ता माझ पस्किएर बजार जोगाउने प्रयासमा लागेको हो।
प्रमुख दैनिक उपभोग्य वस्तु(एफएमसीजी) उत्पादक सीजी फुड्स नेपालले आफ्नो नयाँ ब्रान्ड ‘सो यम’ को सहारामा प्रति-आक्रामक बजारिकरणको प्रयास गरिरहेको छ। ‘सो यम’ ब्राण्डमा यसले पहिलो चरणमा तयारी चाउचाउ, ओट्स, कर्न फ्लेक्स, चीज बल र कोरियन सिन राम्यून चाउचाउ सहित कम्तीमा १० नयाँ उत्पादनहरू ल्याउँदैछ।
यशोदा फुड्स र एशियन थाइ फुड्सको उत्पादन तीब्र प्रतिस्पर्धाका कारण बजार हिस्सा र आम्दानी दुबैमा आएको उल्लेखनीय क्षयका कारण सीजी फुड्स बजार हिस्सा जोगाउन यो कदम चाल्न बाध्य भएको हो।
गत जेठमा वाईवाई क्वीक ब्राण्डमा कोरियन पिरो चाउचाउ सिन राम्यून बजारमा ल्याएकोमा अहिले सो यम ब्राण्डबाट पनि उही स्वादको चाउचाउ ल्याउँदैछ। सीजी फुड्सले वाईवाई, क्वीक र सोल्टी ब्राण्डमा पहिले नै २६ वटा भेराइटीमा चाउचाउ भुजिया बेचि रहेकोछ।
सिजी फूड्स (आर्थिक वर्ष २०२४ अपरिष्कृत वित्तीय विवरण अनुसार) प्रतिस्पर्धी कार्य बजार प्रभाव बिक्री राजस्व ११ अर्ब ६७ करोडमा झरेको थियो। अघिल्लो आवमा यसको कुल आम्दानी १२ अर्ब ५१ करोड रूपैयाँ रहेको थियो। नाैलाे स्वाद र आकर्षक प्याकेजिङ र महँगो मूल्यमा यशोदा फूड्सको करेण्ट ब्राण्डको तयारी चाउचाउको बढ्दो लोकप्रियताले सिजी फुड्सको बिक्री ६.७ प्रतिशतले खुम्चिएको हो।
प्रतिस्पर्धी वृद्धि एशियन थाई फूड्स (रमपम, टु पिएम) ले ३.०२ प्रतिशतले व्यापार बढाएर ४ अर्ब ८७ करोड पुर्याएको थियो ।
बाध्यता: किन ‘सो यम’ ?
सीजी फूड्सको वाईवाईको व्यापार शुरूवात देखि नै उच्च उत्पादन परिमाण र न्यून उत्पादन लागतको परम्परागत रणनीतिमा निर्भर रहेको छ। सस्तो मूल्यमा स्वादिलो चाउचाउ पस्केर बजारमा आधिपत्य जमाइ राख्ने वाईवाईको परम्परागत रणनीति अब असफल प्रमाणित हुँदैछ।
वाईवाईको परम्परागत रणनीतिलाई चुनाैती दिंदै प्रतिस्पर्धिहरूले थोरै उत्पादन र महँगो मूल्यको प्याकिङमा एक पछि अर्को गर्दै फरक स्वादका चाउचाउ पस्किएर बजारमा आफ्नो सशक्त उपस्थिति दर्ज गरेका छन् । करेण्ट, टु पिएम जस्ता चाउचाउको बढ्दो मागले नेपाली उपभोक्ताको बदलिंदो रूचीलाई प्रतिनिधित्व गरेको छ, जसको पहिचान गर्न वाईवाई असफल रह्यो र अन्ततः ग्लोबल ब्राण्ड घरेलु मैदानमै संघर्ष गर्नुपर्ने अवस्थामा पुगेको छ।
उद्योग सम्बद्ध श्रोतका अनुसार, ‘सो यम’ ब्राण्डमा आलु चिप्स, कर्न फ्लेक्स, इन्स्टान्ट ओट्स, भेज मसाला नुडल्स, चिकेन फ्लेभर्ड नुडल्स, कीमा नुडल्स र सिन रामयन नुडल्स ल्याउने तयारी छ। यसबाहेक फन्ज ब्राण्डमा चीज बल्स, चिप्स र क्वीक ब्राण्डमा सिन रामयन नुडल्स उत्पादन गरिंदैछ।
क्वीक्स र सो यम दुबै ब्राण्ड अन्तर्गत ल्याउन लागिएको सिन रामयन नुडल्स कोरियन नुडल्सका रूपमा प्रसिद्ध छ। यूवा पुस्ता माझ यो नुडल्स निक्कै लोकप्रिय बन्दै गएको छ।
‘सो यम’ रणनीति यसकारण आवश्यक छ:
नवप्रवर्तन र प्रिमियम स्थिति पुन: प्राप्तीको प्रयासः नयाँ ब्रान्डले सिन राम्युन (एक ज्ञात विश्वव्यापी प्रिमियम नुडल्स) र विविध खाजा जस्ता परिष्कृत उत्पादनहरू सहित आकर्षक प्रिमियम खण्डलाई लक्षित गरिरहेको छ। यसले प्रतिद्वन्द्वीहरूमाझ ‘नयाँपन’ को उपस्थिति दर्ज गर्न मद्दत गर्ने कम्पनीको विश्वास छ।
नूडल्सभन्दा बाहिर विविधीकरणः ओट्स, कर्न फ्लेक्स, र राम्रो-गुणस्तरको चिप्स, चीज बलहरूमा बिस्तार गर्नाले अति प्रतिस्पर्धी तयारी चाउचाउबाट केन्द्रित आम्दानीलाई विविधिकरण गर्न मद्दत गर्न सक्छ।
मूल्य-आधारित पहिचान सिर्जनाः ‘सो यम’ मूल्य-संचालित ब्रान्डको रूपमा डिजाइन गरिएको भए,यसले बजेट-केन्द्रित वाईवाई भन्दा विपरित, बढ्दो कच्चा पदार्थ लागत र बजार दबाबलाई थेग्न उच्च मार्जिन आम्दानीका लागि उपयोगी साबित हुनसक्छ।
भावी जोखिमहरूः
सीजी फुड्सका लागि घरेलु बजारमा विरासत जोगाइ राख्न ‘सो यम’ को आगमन महत्त्वपूर्ण भए पनि,केही ठूला जोखिम पनि सँगसँगै आउनेछ।
ब्रान्ड क्षयीकरण: पहिलो जोखिम यो हो की ‘सो यम’ तयारी चाउचाउले उपभोक्ताको ध्यान प्रतिस्पर्धी कम्पनी यसोदा फूड्सको उत्पादन ‘करेन्ट’ चाउचाउतिर भन्दा पनि सीजी फुड्सकै लोकप्रिय ‘वाईवाई’ चाउचाउबाट टाढिन सक्नेछ। यो जोखिमलाइ मध्यनजर गर्दै सीजी फुड्सले ‘सो यम’ ब्राण्डलाई मुख्य ब्राण्डका रूपमा नभएर क्वीक वा जिङ्ग ब्राण्ड झैं उप ब्राण्डका रूपमा अघि सार्नेछ।
कार्यान्वयन जटिलता: आयातित सिन राम्युनदेखि स्थानीय रूपमा उत्पादित ओट्ससम्म – एकैसाथ १० विविध उत्पादनहरू बजारमा ल्याउनाले सरल, सामूहिक बजार उत्पादनको लागि आपूर्ती, वितरण र बजारीकरण प्रणालीहरूमा दबाब देखिन सक्छ। यो जटिलताले वस्तुको गुणस्तर वा आपूर्ति श्रृंखला विफलताको जोखिम बढाउनेछ।
दिगो प्रतिद्वन्द्विता: यासोदा फूड्स (करेन्ट) र एशियाली थाई फूड्स(टु पिए) जस्ता बजार प्रमुखहरू फुर्तिला छन् र आक्रामक रूपमा आफ्नै नव प्रवर्तन वा मूल्य कटौतीको सामना गर्नेछन्, जसले गर्दा नयाँ ‘सो यम’ ब्रान्डलाई प्रिमियम श्रेणीमा पर्याप्त बजार हिस्सा द्रुत रूपमा कब्जा गर्न चुनाेतीको पहाड छिचोल्नुपर्नेछ।
सीजी फुड्स नेपाल लिमिटेड, सीजी कर्प ग्लोबल अन्तर्गतको उद्यम हो। उद्योगी विनोद चाैधरी यो समूहका अध्यक्ष हुन् । उनको जेठा छोरा निर्वाण चाैधरी सीजी फुड्स नेपालको बहुमत(७४ प्रतिशत) शेयरधनी हुन् ।
