काठमाडौं । बेलायतले भिसा नियम कडा पार्दै देशमा प्रवेश गर्नेहरुका लागि ए लेभलको अंग्रेजी प्रवीणता अनिवार्य बनाएको छ।
बेलायती सरकारले चाँडै नै कडा नयाँ नियमहरु लागू गर्नेछ। जसमा केही आप्रवासीले बेलायतमा प्रवेश गर्न ए लेभल (उच्च माध्यमिक) अंग्रेजीमा प्रवीणता हासिल गर्नुपर्नेछ। यी परिवर्तन सन् २०२६ जनवरी ८ देखि लागू हुनेछन्। यसले केही स्नातक आवेदक र ‘कुशल कामदार’ वा ‘स्केल–अप’ भिसाका लागि आवेदन दिनेलाई असर गर्नेछ।
सरकारले यी नयाँ नियम मे महिनामा जारी गरिएको श्वेतपत्रमा उल्लिखित बेलायतमा आप्रवासन घटाउने फराकिलो योजनाको हिस्सा भएको जनाएको छ। गृह सचिव शबाना महमुदले भनिन्, ‘यदि तपाइँ यो देशमा आउनुभयो भने तपाइँले हाम्रो भाषा सिक्नुपर्छ र समाजमा योगदान दिनुपर्छ।’
महमुदले थपिन्, ‘यस देशले सधैँ यहाँ योगदान गर्न आउनेहरुलाई स्वागत गरेको छ। तर, आप्रवासीहरुले हाम्रो भाषा नसिखी यहाँ आउनु र हाम्रो राष्ट्रिय जीवनमा योगदान दिन असमर्थ हुनु अस्वीकार्य छ।’
