काठमाडौं। जेनजी युवाले मुख्य रुपमा उठाएका संसद विघटनको मुद्दामा राष्ट्रपति रामचन्द्र पौडेलले आलटाल गरिरहेका छन्। जसका कारण अझै पनि अन्तरिम सरकार गठनको विषयमा सहमति जुट्न सकेको छैन।
अन्तरिम सरकारको प्रधानमन्त्रीमा पूर्वप्रधानन्यायाधीश सुशीला कार्कीलाई नियुक्त गर्ने विषयमा राष्ट्रपति पौडेल र जेनजी प्रतिनिधिबीच सहमति भइसकेको छ। तर, संसद विघटनको विषयमा सहमति नजुट्दा अन्तरिम सरकार गठनको प्रक्रियामा ढिलाइ भइरहेको हाल शीतल निवासमा उपस्थित एक जेनजी प्रतिनिधिले बताए।
शीतल निवासमा जारी वार्तामा जेनजी प्रतिनिधि गएका छन्। ‘राष्ट्रपतिले संसद् विघटनमा आलटाल गर्दै समय घर्काउन खोजिरहेका छन्, त्यही कारण अन्तरिम सरकार गठनमा ढिलाइ भइरहेको छ’, ती जेनजी प्रतिनिधिले भने।
उता अन्तरिम सरकारको प्रधानमन्त्री बन्ने पक्काजस्तै देखिएकी कार्की भने अहिले घरमै छिन्। उनले सहमति जुटेको खण्डमा मात्रै आफूलाई सम्पर्क गर्न भनेको ती जेनजी प्रतिनिधिले जानकारी दिए।
