काठमाडौं । एआई चिप निर्माता एनभिडियाले हरेक दिन नयाँ इतिहास रचिरहेको छ। ४ ट्रिलियन डलरको बजार पुँजीकरण कायम गर्ने विश्वको पहिलो कम्पनी बनेपछि यो कम्पनीले अर्को नयाँ रेकर्ड बनाएको छ।
अमेरिकी एस एन्ड पी ५०० सूचकांकमा एनभिडियाको हिस्सा ८ प्रतिशत पुगेको छ। अमेरिकामा यस्तो रेकर्ड राख्ने काम सन् १९८१ मा सुरु भएको थियो र अहिलेसम्म कुनै पनि कम्पनी यो स्थानमा पुग्न सकेको छैन। एनभिडियाको स्टक जसरी बढिरहेको छ, यसले आगामी दिनमा धेरै नयाँ रेकर्ड बनाउन सक्छ।
एनभिडियाको बजार पुँजीकरण ४.४५५ ट्रिलियन डलर पुगेको छ। अमेरिकाको इतिहासमा यसअघि एउटा मात्र कम्पनी एस एन्ड पी ५०० सूचकांकमा ७ प्रतिशतभन्दा माथि पुग्न सफल भएको थियो। आईफोन निर्माता एप्पलले सन् २०२३ मा यो उपलब्धि हासिल गरेको थियो।
सन् २००० को डट–कम बबलमा पनि कुनै पनि कम्पनीले यस तरिकाले एस एन्ड पी ५०० सूचकांकमा प्रभुत्व जमाएको थिएन। सन् १९९९ मा माइक्रोसफ्टको एस एन्ड पी ५०० सूचकांकमा ४ प्रतिशत हिस्सा थियो र सन् २००० मा जनरल इलेक्ट्रिकको ६ प्रतिशत हिस्सा थियो।
सन् १९८४ मा आईबीएमको एस एन्ड पी ५०० सूचकांकमा ६ प्रतिशत हिस्सा थियो। विज्ञहरु भन्छन्, ‘विश्वमा एआई क्रान्ति भर्खरै सुरु भएको छ। आगामी दिनमा विश्वमा एआईको प्रयोग बढ्दै जाँदा एनभिडिया र अन्य चिप निर्माण कम्पनीहरुको शेयर बढ्नेछ।’
विज्ञहरुका अनुसार आगामी २ वर्षमा एनभिडियाको शेयर ३०० डलरसम्म जान सक्छ। पछिल्ला केही महिनामा कम्पनीको शेयरमा ठूलो वृद्धि देखिएको छ। अप्रिलमा यसको मूल्य लगभग ९५ डलर थियो र आज यो लगभग १८३ डलरको आसपास पुगेको छ।
