काठमाडौं । भारतको उत्तर प्रदेशको दनकौर गाउँमा बस्ने एक बेरोजगार युवाको बैंक खातामा अचानक अर्बौं रुपैयाँ आएको घटना सार्वजनिक भएको छ।
स्थानीय २० वर्षीय दीपु उर्फ दिलीप सिंहले दुई महिनाअघि कोटक महिन्द्रा बैंकमा आफ्नो खाता खोलेका थिए। जब दिलीपले अगस्ट २ मा बैंकको मोबाइल एपमा लग इन गरे तब उनी छक्क परे। उनको मुटु जोड–जोडले धड्कन थाल्यो।
जब खातामा रु. १०,०१,३५,६०,००,००,००,००,००,०१,००,२३,५६,००,००,००,००,२९९ देखियो तब दिलीपले धेरै पटक मोबाइल एप बन्द गरे। धेरै पटक पासवर्ड परिवर्तन गरे। तर, अर्बौं रुपैयाँ खाताबाट देखिई नै रह्यो।
बीबीसीसँग कुरा गर्दै दिलीपले भने, ‘रकम यति ठूलो थियो कि मैले गन्न सकिनँ। म केवल यो संख्या ३७ अंकको थियो भनेर गन्न सक्थेँ। मैले गुगलमा पनि अनुवाद गर्ने प्रयास गरेँ तर यसले मलाई पनि मद्दत गरेन।’
दिलीप भन्छन्, ‘मैले यो धेरै मानिसलाई पनि देखाएँ तर कसैले पनि यति ठूलो रकम गन्न सकेनन्।’ जब दिलीप आफैँ क्यामेराको अगाडि यो रकम गन्न खोज्थे तब उनले १० अर्बसम्म गनेपछि हात उठाउँथे र भन्थे ‘मलाई योभन्दा बाहिर कसरी गने थाहा छैन।’
मनमा उथलपुथल
दिलीप १२ औँ पास छन् र बेरोजगार छन्। उनी केही समयदेखि काम खोजिरहेका छन्। आफ्नो बैंक खातामा अर्बौं रुपैयाँ देखेर दिलीपले सुरुमा सोचे कि यो प्राविधिक त्रुटि हुन सक्छ। तर, बारम्बार जाँच गर्दा उही रकम देखिन्थ्यो। दिलीप भन्छन्, ‘मैले सोचेको थिएँ कि यति धेरै पैसा छ, त्यसैले मैले १० हजार रुपैयाँ अर्को खातामा स्थानान्तरण गर्ने प्रयास गरेँ तर त्यो हुन सकेन। बैंकले मेरो खाता फ्रिज गरेको छ।’
दिलीप भन्छन्, ‘यति धेरै पैसा देखेर म छक्क परेँ, एकछिनका लागि मलाई लाग्यो कि मैले लटरी जितेको छु तर लटरी पनि यति ठूलो हुने थिएन।’
जब दिलीपलाई उनको बैंक खातामा अर्बौं रुपैयाँ आउनुअघि कति ब्यालेन्स थियो भनेर सोधियो तब उनले भने, ‘मैले खातामा १०–२० रुपैयाँ मात्र छोडेको थिएँ।’
बैंकले के भन्यो ?
दिलीपले आफँं कोटक महिन्द्रा बैंकमा अनलाइन बचत खाता खोलेका थिए। आफ्नो खातामा अर्बौं रुपैयाँ आएको जानकारी दिन दिलीप आफैँ बैंक गएका थिए। बैंकले दिलीपलाई भन्यो, ‘डराउनु पर्ने केही छैन। देखिने रकम पैसा होइन तर यो प्राविधिक त्रुटि हो।’
दनकौर प्रहरीचौकीका उपनिरीक्षक सोहनपाल सिंहले बीबीसीलाई भने, ‘प्रहरीले अनुसन्धान गरेको छ। फोनपे र बैंक स्टेटमेन्ट जाँच गरेपछि युवाको खातामा रहेको ब्यालेन्स शून्य रुपैयाँ देखाइएको छ।’
सोहनपालले भने, ‘प्रहरीले बैंकलाई पनि सम्पर्क गरेको छ। प्राविधिक त्रुटिका कारण यो रकम विशेष एपमा देखिन्छ। जब कि वास्तवमा खातामा एक रुपैयाँ पनि छैन।’
के भन्छन् छिमेकी ?
दिलीपको खातामा अर्बौं रुपैयाँ आएको खबर दनकौर सहरभरि फैलिएको छ। यो कथा सबैको ओठमा छ। मिडियाकर्मी पनि धेरै दिनदेखि दिलीपलाई भेट्न आइरहेका छन्।
दिलीपका एक छिमेकी भन्छन्, ‘मेरो नाम पनि दिलीप हो। मानिसहरुले धेरै दिनदेखि उनको कारणले मलाई फोन गरिरहेका छन्। यस क्षेत्रका धेरैजसो मानिस गरिब छन्। खातामा यति ठूलो रकम देखेर सबै छक्क परेका छन्।’
उनी भन्छन्, ‘दिलीपका साथीहरुले आफ्नो सामाजिक सञ्जालमा बैंक ब्यालेन्सको स्क्रिनसट पोस्ट गरिरहेका छन् र केही पोस्टहरु भाइरल पनि भइरहेका छन्।’
अर्का छिमेकी सुमन भन्छिन्, ‘पैसा आउँदा कसैलाई नराम्रो लाग्दैन, यो धेरै राम्रो लाग्छ। यसको चर्चा दनकौरभरि भइरहेको छ। दिलीपका आमाबाबुको मृत्यु भइसकेको छ र उनी हजुरआमासँग बस्छन्। उनको कुनै काम छैन। हामी चाहन्छौँ कि उसले केही सहयोग पाओस्।’ –बीबीसीबाट भावानुवादित
