काठमाडौं । ह्याकरहरुले उत्तरी अमेरिकामा बीमा कम्पनी एलियान्ज लाइफका १४ लाखभन्दा बढी ग्राहकको व्यक्तिगत जानकारी चोरेका छन्।
एलियान्जले एक विज्ञप्तिमार्फत साइबर हमलामार्फत ती ग्राहकको व्यक्तिगत जानकारी चोरी भएको जानकारी गराएको हो। ‘जुलाई १६ मा एक दुर्भावनापूर्ण धम्की दिने व्यक्तिले उत्तरी अमेरिकाको एलियान्ज लाइफ इन्स्योरेन्स कम्पनी (एलियान्ज लाइफ) द्वारा प्रयोग गरिएको थर्ड पार्टी, क्लाउड–बेस्ड सीआरएम प्रणालीमा पहुँच प्राप्त गरेको हो’, विज्ञप्तिमा भनिएको छ।
एलियान्ज लाइफको जर्मनस्थित मूल कम्पनीले भनेको छ, ‘ह्याकरहरुले सामाजिक इन्जिनियरिङ प्रविधिहरु प्रयोग गरेर एलियान्ज लाइफका अधिकांश ग्राहक, वित्तीय पेसेवर र चयन गरिएका एलियान्ज लाइफ कर्मचारीको व्यक्तिगत रुपमा पहिचानयोग्य डाटा प्राप्त गर्न सफल भएका छन्।’
कम्पनीका अनुसार डाटा चोरी एलियान्ज लाइफसँग मात्र सम्बन्धित छ। कम्पनीले अमेरिकी राज्य मेनका महान्यायाधिवक्तामा दायर निवेदनमा डाटा चोरीको विषयमा खुलासा गरेको हो। यसले कति मानिस प्रभावित भए भनेर कम्पनी जानकारी गराएको छैन।
विज्ञप्तिमा कम्पनीले उल्लंघन नियन्त्रण गर्न ‘तत्काल कारबाही’ गरेको र एफबीआईलाई सूचित गरेको उल्लेख गरेको छ। कम्पनीले भनेको छ, ‘हाम्रो नीति प्रशासन प्रणालीसहित एलियान्ज लाइफ नेटवर्क वा अन्य कम्पनी प्रणालीमा पहुँच गरिएको कुनै प्रमाण छैन।’
एलियान्जको विश्वव्यापी रुपमा १२ करोड ५० लाखभन्दा बढी ग्राहक छन्। कम्पनीले भन्यो, ‘यो डाटा चोरीबाट प्रभावित व्यक्तिलाई सम्पर्क गर्ने र सहयोग गर्ने प्रक्रियामा छौँ।’
सामाजिक इन्जिनियरिङ साइबर आक्रमण तब हुन्छ जब ह्याकरहरुले विश्वसनीय कम्पनी वा व्यक्तिको नक्कल गरेर प्रयोगकर्तालाई संवेदनशील जानकारी त्याग्न दबाब दिन्छन् वा धोका दिन्छन्। –एजेन्सी
