काठमाडौं । वाणिज्य बैंकहरुले चालु आर्थिक वर्षको ११ महिना जेठसम्ममा कर्मचारीको तलबभत्तामा ५३ अर्ब १३ करोड रुपैयाँ बढी खर्च गरेका छन्।
नेपाल राष्ट्र बैंकले सार्वजनिक गरेको तथ्यांकअनुसार २० वटा वाणिज्य बैंकहरु जेठसम्म कर्मचारीको तलबभत्तामा ५३ अर्ब १३ करोड ३१ लाख रुपैयाँ खर्च गरेका हुन्। अघिल्लो वर्ष यही अवधिसम्म बैंकहरुले ५० अर्ब १६ करोड ४९ लाख रुपैयाँ खर्च गरेका थिए। अघिल्लो वर्षको तुलनामा बैंकहरुले कर्मचारीको तलबभत्तामा खर्च गर्ने रकम ५.९२ प्रतिशतले बढेको छ।
कर्मचारीको तलबभत्तामा सबैभन्दा धेरै खर्च गर्नेमा राष्ट्रिय वाणिज्य बैंक रहेको छ भने वृद्धिदरको हिसाबले एनएमबि बैंक अगाडि रहेको छ। अघिल्लो वर्षको तुलनामा १६ वटा वाणिज्य बैंकको कर्मचारीको तलबभत्तामा जाने खर्च बढेको छ भने ४ वटाको घटेको छ।
चालु आर्थिक वर्षको ११ महिनामा राष्ट्रिय वाणिज्य बैंकले कर्मचारीको तलबभत्तामा ३ अर्ब ८९ करोड ७६ लाख रुपैयाँ खर्च गरेको छ। अघिल्लो वर्ष यही अवधिसम्म यो शीर्षकको खर्च ३ अर्ब ९३ करोड ६९ लाख रुपैयाँ रहेको थियो। अघिल्लो वर्षको तुलनामा खर्च १ प्रतिशतले घटेको छ।
यसैगरी कर्मचारीको तलबभत्तामा दोस्रो खर्च गर्ने बैंकमा कुमारी रहेको छ। कुमारीले चालु आर्थिक वर्षको जेठसम्म ३ अर्ब ६८ करोड ८५ लाख रुपैयाँ खर्च गरेको छ। अघिल्लो वर्ष यही अवधिसम्म यस्तो खर्च ३ अर्ब ८० करोड ५८ लाख रुपैयाँ थियो। कुमारी बैंकको खर्च पनि ३.०८ प्रतिशतले घटेको छ।
तेस्रोमा ग्लोबल आइएमई बैंक रहेको छ। अघिल्लो वर्ष जेठसम्म कर्मचारीको तलबभत्ता ३ अर्ब ४२ करोड ४९ लाख रुपैयाँ खर्च गरेको बैंकले समीक्षा अवधिसम्म ३ अर्ब ५८ करोड ८२ लाख रुपैयाँ खर्च गरेको छ। अघिल्लो वर्षको तुलनामा समीक्षा अवधिमा बैंकको खर्च ४.७७ प्रतिशतले बढेको छ।
यसैगरी जेठसम्म लक्ष्मी सनराइज बैंकले ३ अर्ब ५३ करोड ७७ लाख रुपैयाँ, प्रभु बैंकले ३ अर्ब ४६ करोड ८ लाख रुपैयाँ, नेपाल बैंकले ३ अर्ब ४५ करोड १३ लाख रुपैयाँ, कृषि विकास बैंकले ३ अर्ब ३८ करोड २१ लाख रुपैयाँ, नबिल बैंकले ३ अर्ब ३३ करोड १० लाख रुपैयाँ र एनआईसी एसिया बैंकले ३ अर्ब ५ करोड ५१ लाख कर्मचारीको तलबभत्तामा खर्च गरेका छन्। अघिल्लो वर्षको तुलनामा समीक्षा अवधिमा लक्ष्मी सनराइज बैंक, प्रभु बैंक, नेपाल बैंक र कृषि विकास बैंकको खर्च बढ्दा नबिल बैंक र एनआईसी एसिया बैंकको घटेको छ।
त्यस्तै समीक्षा अवधिसम्म कर्मचारीको तलबभत्तामा हिमालयन बैंकले २ अर्ब ९७ करोड ७६ लाख रुपैयाँ, नेपाल इन्भेस्टमेन्ट मेगा बैंकले २ अर्ब ९२ करोड १४ लाख रुपैयाँ, एनएमबि बैंकले २ अर्ब ६३ करोड ९७ लाख रुपैयाँ, सिद्धार्थ बैंकले २ अर्ब ५१ करोड ५८ लाख रुपैयाँ, माछापुच्छ्रे बैंकले १ अर्ब ९१ करोड ८४ लाख रुपैयाँ, एभरेस्ट बैंकले १ अर्ब ६३ करोड ८७ लाख रुपैयाँ, सिटिजन्स बैंकले १ अर्ब ५८ करोड ३ लाख रुपैयाँ, प्राइम बैंकले १ अर्ब ५६ करोड २५ लाख रुपैयाँ, नेपाल एसबीआई बैंकले १ अर्ब ५३ करोड २८ लाख रुपैयाँ, सानिमा बैंकले १ अर्ब ४९ करोड ११ लाख रुपैयाँ र स्ट्यान्डर्ड बैंकले ९६ करोड २० लाख रुपैयाँ खर्च गरेको छ। यी सबै बैंकको कर्मचारीको तलबभत्तामा जाने खर्च बढेको छ।
