काठमाडौं । अब अमेरिका पनि इजरायल र इरान बीचको युद्धमा प्रवेश गरेको छ। अमेरिकाले आइतबार बिहान आफ्नो हवाई आक्रमणमा इरानका तीन आणविक स्थल फोर्डो, नातान्ज र इस्फहानलाई निशाना बनाएको छ। इजरायलले यी आक्रमणका लागि अमेरिकाको प्रशंसा गरेको छ।
यसैबीच संयुक्त राष्ट्रसंघ (यूएन)ले इरानमाथि अमेरिकी कारबाहीप्रति चिन्ता व्यक्त गरेको छ। यूएनले भन्यो, ‘यो द्वन्द्व हातबाट बाहिर निस्कने खतरा द्रुत गतिमा बढ्दैछ।’
यूएनका महासचिव एन्टोनियो गुटेरेसले भने, ‘आज अमेरिकाले इरानविरुद्ध गरेको सैन्य कारबाहीको बारेमा सुनेर म निकै चिन्तित छु। यो पहिले नै तनावको स्थितिमा रहेको क्षेत्रमा खतरनाक उत्तेजक कार्य हो र यो अन्तर्राष्ट्रिय शान्ति र सुरक्षाको लागि प्रत्यक्ष खतरा हो।’
गुटेरेसले भने, ‘यो द्वन्द्व नियन्त्रण बाहिर जानुको खतरा द्रुत गतिमा बढ्दैछ। यसले सामान्य नागरिकमा मात्र नभई सम्पूर्ण क्षेत्र र सम्पूर्ण विश्वमा विनाशकारी प्रभाव पार्न सक्छ। म सबै सदस्य राष्ट्रलाई तनाव कम गर्न र यूएनको बडापत्र र अन्तर्राष्ट्रिय कानुनका अन्य नियमअन्तर्गत आफ्नो जिम्मेवारी पूरा गर्न अपिल गर्दछु।’
यूएनले यस अत्यन्तै संवेदनशील समयमा अराजकताबाट बच्नु धेरै महत्त्वपूर्ण रहेको जनाएको छ। ‘यस संकटको कुनै सैन्य समाधान छैन’, यूएनले भनेको छ, ‘अगाडि बढ्ने बाटो केवल कूटनीति हो र शान्ति नै एकमात्र आशा हो।’
ट्रम्पले आइतबार राष्ट्रलाई सम्बोधन गर्दै शान्तिका लागि अपिल गरे र इरानलाई चेतावनी दिए कि धेरै निशाना अझै बाँकी छन्। ‘यदि इरान अझै शान्तितर्फ अघि बढेन भने भविष्यमा अझ भयानक आक्रमण हुनेछ’, ट्रम्पले भने, ‘या त इरानमा शान्ति आउनेछ या त विनाश हुनेछ।’
