काठमाडौं । नेपाल राष्ट्र बैंकको निर्देशनबमोजिम २०८१ माघ १ गतेदेखि बैंक तथा वित्तीय संस्थामा खाता खोल्दा ग्राहकको राष्ट्रिय परिचपत्र पेस गर्नुपर्ने अनिवार्य गरिएको छ।
बैंक तथा वित्तीय संस्थाले आफ्ना ग्राहकको खाता खोल्दा राष्ट्रिय परिचयपत्र वा राष्ट्रिय परिचयपत्र नम्बरको विवरण यकिन गर्नुपर्छ। अनिवार्य रुपमा राष्ट्रिय परिचयपत्र वा राष्ट्रिय परिचयपत्र नम्बरका आधारमा मात्र मात्रै खाता खोल्नुपर्ने प्रावधान रहेको छ।
नेपाल राष्ट्र बैंकले वित्तीय चेतनाका लागि आज एक सूचना जारी गर्दै यसबारे जानकारी गराएको हो। विदेशमा बसोबास गरिरहेका नेपाली नागरिकको हकमा विदेशमै बसी अनलाइनमार्फत इजाजतपत्रप्राप्त संस्थामा खाता खोल्नुपर्दा राष्ट्रिय परिचयपत्र वा राष्ट्रिय परिचयपत्र नम्बरबाहेकका अन्य आवश्यक कागजात लिएरसमेत खाता खोल्न सक्ने व्यवस्था राष्ट्र बैंकले गरेको छ। ‘यसरी खोलिने खाताका सम्बन्धमा निज खातावाला नेपाल फर्किएको ३५ दिनभित्र सम्बन्धित बैंक तथा वित्तीय संस्थाले राष्ट्रिय परिचयपत्रको विवरण लिई अद्यावधिक गर्नुपर्नेछ’, सूचनामा भनिएको छ।
यसैगरी आफ्नो हेरचाह आफैँ गर्न नसक्ने, अशक्त, असहाय नागरिकले राष्ट्रिय परिचयपत्र वा राष्ट्रिय परिचयपत्र नम्बरबाहेकका अन्य आवश्यक कागजात संलग्न गरेरसमेत बैंक खाता खोल्न र कारोबार गर्न सक्ने केन्द्रीय बैंकले व्यवस्था गरेको छ। ‘प्रमाणित विवरणले बैंक र ग्राहकबीच पारदर्शिता बढाउँछ’, राष्ट्र बैंकले भनेको छ।
