काठमाडौं । अन्तर्राष्ट्रिय मुद्रा कोष (आईएमएफ) ले बंगलादेशको अर्थतन्त्र निरन्तर समस्याको सामना गरिरहेको र यसलाई बाहिरबाट ठूलो मात्रामा कोषको आवश्यकता रहेको जनाएको छ। आईएमएफ टोलीले अप्रिल ६ देखि १७ सम्म ढाकामा दुई हप्ता छलफल गर्यो तर ४.७ अर्ब डलरको ऋणको अर्को किस्तामा सहमतिमा पुग्न सकेन।
आईएमएफले स्पष्ट रुपमा भनेको छ कि बंगलादेशलाई आफ्नो आय बढाउन ठोस योजना चाहिन्छ। अर्थात् कर–जीडीपी अनुपात र मुद्रा विनिमयलाई अझ लचिलो बनाउनुपर्नेछ। यी दुई मुद्दा अझै विचाराधीन छन्।
यसपटक आईएमएफले कुनै प्रत्यक्ष सहमति दिएन। तर यो ‘अन्तिम मौका’ हुन सक्ने संकेतमार्फत स्पष्ट पार्यो। ‘सुधार आवश्यक छ, नत्र समस्या अझ बढ्नेछ’, आईएमएफले भनेको छ। अब दुई पक्षबीचको वार्ता वासिंगटनमा हुने आईएमएफ–विश्व बैंकको स्प्रिङ मिटिङका क्रममा पुनः सुरु हुनेछ। जहाँ सम्झौता हुने अपेक्षा गरिएको छ।
आईएमएफमा बंगलादेश मिसनका प्रमुख क्रिस पापाजर्जियोले देशको अर्थतन्त्र कठिन अवस्थामा रहेको बताए। उनले भने, ‘बंगलादेशले धेरै चुनौतीको सामना गरिरहेको छ, त्यसमाथि विश्वभर अनिश्चितता पनि बढेको छ।’
आर्थिक वर्ष २०२४–२५ को पहिलो ६ महिनामा जीडीपी वृद्धिदर ३.३% मा झरेको छ। जुन गत वर्षको ५.१% थियो। मार्चमा मुद्रास्फीति ९.४% थियो। जब कि केन्द्रीय बैंकको लक्ष्य ५–६% छ।
ढाकामा आयोजित पत्रकार सम्मेलनमा आईएमएफका आवासीय प्रतिनिधि जयन्दु डेले वार्ता अर्को हप्ता वासिंगटनमा जारी रहने बताए। उनले भने, ‘यदि सबै कुरा ठीकठाक भयो भने हामी जुन महिनाको अन्त्य अघि ऋणको अर्को किस्ता दिने प्रयास गर्नेछौँ।’ –एजेन्सी
