काठमाडौं । साउदी अरबले १४ देशका नागरिकलाई भिसामा अस्थायी प्रतिबन्ध लगाएको छ। व्यापार र पारिवारिक भिसाबाहेक साउदी सरकारको यो प्रतिबन्ध उमराह भिसामा पनि लागू हुनेछ। भिसामा अस्थायी प्रतिबन्धको यो निर्णयले दर्ता नगरी हज जाने मानिसलाई रोक्नका लागि हो।
यो प्रतिबन्ध मध्य जुनसम्म अर्थात यस वर्षको हज पूरा नभएसम्म जारी रहनेछ। साउदी अधिकारीहरूले भनेका छन् कि विदेशीहरु अप्रिल १३ सम्म मात्र उमराह भिसाका लागि आउन सक्छन्। त्यसपछि उमराह भिसा दिइने छैन। गत वर्ष साउदीमा हजका क्रममा हजारौँको मृत्यु भएको थियो। मृत्यु हुनेमा अधिकांश अनधिकृत हज यात्री थिए। यस्तो अवस्थामा यो भिसा प्रतिबन्धको उद्देश्य मानिसलाई दर्ता बिना हज यात्रा गर्नबाट रोक्नु हो।
साउदी युवराज मोहम्मद बिन सलमानले हजमा व्यवस्था कायम राख्न भिसामा कडाइ गर्न यो निर्णय गरेका हुन्। साउदी अरेबियाले १४ देशका लागि अस्थायी भिसा प्रतिबन्ध लगाएको छ। ती देशमा पाकिस्तान, भारत, बंगलादेश, इजिप्ट, इन्डोनेसिया, इराक, नाइजेरिया, जोर्डन, अल्जेरिया, सुडान, इथियोपिया, ट्युनिसिया र यमन पर्छन्।
साउदी अरबको विदेश मन्त्रालयले यो अस्थायी भिसा प्रतिबन्धले यात्रा नियमलाई सहज बनाउन मद्दत गर्ने जनाएको छ। यसले हजको समयमा सुरक्षामा सुधार गर्नेछ। अधिकारीहरुले मानिसहरुलाई कुनै पनि समस्याबाट बच्नका लागि नयाँ नियम पालना गर्न आग्रह गरेका छन्। प्रतिबन्धको बाबजुद कोही अवैध रुपमा साउदी अरबमा बस्यो भने उसलाई पाँच वर्षसम्म साउदी अरब आउनबाट रोक लगाउन सकिन्छ।
साउदी अरेबियाले पहिले नै १६ भाषामा हज र उमराहका लागि डिजिटल गाइड जारी गरिसकेको छ। साउदी मिडियाका अनुसार यो गाइड धेरै ढाँचामा उपलब्ध छ। साउदी अधिकारीहरुले हजका क्रममा मानिसहरुको सुरक्षाप्रति गम्भीर रहेको बताएका छन्। तिनीहरु सुनिश्चित गर्न चाहन्छन् कि मानिसहरुले आफ्नो हज सुरक्षित र आरामसँग पूरा गर्न सक्छन्। साउदी सरकारले हज यात्रामा कडा नियन्त्रण राख्छ र प्रत्येक देशका लागि हज तीर्थयात्रीको निश्चित संख्या तोकेको छ। यद्यपि, धेरै विदेशी दर्ता बिना हजमा सहभागी हुन्छन्।
सन् २०२४ मा समस्या विशेषगरी गम्भीर भयो। जब चरम गर्मी र भीडका कारण १ हजारभन्दा बढी हज तीर्थयात्रीको मृत्यु भयो। साउदी अधिकारीहरुले अनधिकृत हजयात्रीको संकटलाई ध्यानमा राख्दै भिसा नियन्त्रणको आवश्यकता महसुस गरेको बताएका छन्। –एजेन्सी
