काठमाडौं । अमेरिकी राष्ट्रपति डोनाल्ड ट्रम्पविरुद्ध देशैभर विरोध प्रदर्शन भइरहेको छ। राष्ट्रपतिको पद ग्रहण गरेपछि अमेरिकी जनताले ट्रम्पको विरोध गरेको यो पहिलोपटक हो।
अमेरिकाका सबै ५० राज्यका करिब १ हजार २०० स्थानमा जनताहरुले प्रदर्शन सुरु गरेका छन्। यी विरोध प्रदर्शनलाई ‘ह्यान्ड्स अफ’ नाम दिइएको छ। यसको अर्थ ट्रम्पले जनताको मामिलामा हस्तक्षेप गर्नु हुँदैन भन्ने हो।
प्रदर्शनकारीले सामाजिक र आर्थिक मामिलालगायत धेरै मुद्दामा ट्रम्पको अजेन्डाप्रति असन्तुष्टि व्यक्त गरेका छन्। ट्रम्पले विश्वका धेरै देशमा ट्यारिफ लगाउने घोषणा गरेपछि अमेरिका बाहिर पनि धेरै बैठक आयोजना गरिएको थियो। यसमा लन्डन, पेरिस र बर्लिनजस्ता सहर समावेश छन्।
अमेरिकाको बोस्टनमा केही प्रदर्शनकारीले अमेरिकी विश्वविद्यालयका विद्यार्थीमाथि अध्यागमनसम्बन्धी छापा मारेको कारण विरोध गरिरहेको बताएका छन्। हालै अमेरिकी विश्वविद्यालयका केही विदेशी विद्यार्थीलाई गिरफ्तार गरी उनीहरुलाई देश निकाला कारबाही गरिएको थियो।
प्रजातान्त्रिक सांसदहरुको भाषण सुन्न वासिंगटन डीसीमा हजारौँ प्रदर्शनकारी भेला भएका थिए। यी भाषणमा ट्रम्प प्रशासनका धनीव्यक्तिहरुमाथि धेरै टिप्पणी गरिएको थियो। यीमध्ये सबैभन्दा प्रमुख नाम राष्ट्रपतिको सल्लाहकारका रुपमा काम गर्ने र सरकारी खर्च र कार्यबल कटौती गर्ने प्रयासको नेतृत्व गर्ने एलन मस्कको रहेको छ। –एजेन्सी
