काठमाडौं । बैंकिङ प्रणालीमा तरलता थुप्रिएपछि नेपाल राष्ट्र बैंकले बुधबार १ खर्ब रुपैयाँ तानेको छ।
केन्द्रीय बैंकले निक्षेप संकलन उपकरण प्रयोग गर्दै बैंकिङ प्रणालीबाट १ खर्ब रुपैयाँ तानेको हो। यसका लागि राष्ट्र बैंकले बुधबार ३ बजे अनलाइन बोलकबोल गरेको थियो।
बोलकबोलमा २५ वटा बैंक तथा वित्तीय संस्थाबाट ६६ वटा आवेदन परेको थियो। ती आवेदनमात्रै बैंक तथा वित्तीय संस्थाले २ खर्ब ७ अर्ब १० करोड रुपैयाँ राष्ट्र बैंकलाई दिन आवेदन दिएका थिए। तर, राष्ट्र बैंकले १ खर्ब रुपैयाँमात्रै तानेको छ।
यो २१ दिने निक्षेप संकलन उपकरण थियो। यसको साँवा–ब्याज राष्ट्र बैंकले मंसिर १२ गते बैंक तथा वित्तीय संस्थालाई भुक्तानी गर्नेछ। यो रकमको औसत ब्याजदर २.७२ प्रतिशत कायम भएको छ।
