काठमाडौं । ठूला चाडपर्वका बेलामा कारोबार पनि धेरै हुने भएकोले नेपाल राष्ट्र बैंकले डिजिटल वालेटमा रकम जम्मा गर्ने सीमा बढाएको छ।
केन्द्रीय बैंकले एउटा परिपत्र जारी गर्दै दसैँ, तिहार र छठका अवसरमा प्राकृतिक व्यक्तिको डिजिटल वालेटमा रकम जम्मा गर्ने सीमा बढाएको हो। यी ठूला चाडपर्वका अवसरमा अब प्राकृतिक व्यक्तिले एक दिनमा बढीमा ३० पटकसम्म वालेटमा रकम जम्मा गर्न सक्नेछन्। हाल एक दिनमा १० पटकसम्म वालेटमा रकम जम्मा गर्न पाउने प्रावधान रहेको छ।
परिपत्रमा उल्लेख भएअनुसार दसैँमा असोज २१ गतेदेखि कात्तिक १ गतेसम्म, दीपावली (तिहार) तथा छठका अवसरमा कात्तिक १५ गतेदेखि कात्तिक २२ गतेसम्म यो सुविधा प्रदान गरिएको उल्लेख छ।
राष्ट्र बैंकबाट भुक्तानीसम्बन्धी कार्य गर्ने अनुमति प्राप्त संस्थाहरुलाई सोहीअनुसार गर्न गराउन परिपत्रमा निर्देशन दिइएको छ। तोकिएको समयमा भएको कारोबारको संख्या र कारोबारको कुल रकम केन्द्रीय बैंकको भुक्तानी प्रणाली विभागलाई जानकारी गराउन समेत परिपत्रमा निर्देशनमा दिइएको छ।
