काठमाडौं । वित्तीय माध्यमबाट हुने कारोबारले नेपालमा गति लिइरहेको छ। नेपाल राष्ट्र बैंकले पनि नगदरहित कारोबारलाई प्रोत्साहन गरिरहेको छ। अहिले सानादेखि ठूलठूला मलसम्म वित्तीय माध्यमबाट कारोबार हुने क्रम बढ्न थालेको छ।
पछिल्लो एक वर्षको तथ्यांक हेर्ने हो भने क्यूआरबाट हुने भुक्तानी ९१.९१ प्रतिशतले बढेको छ। अघिल्लो वर्ष जेठसम्म क्यूआरबाट २८ अर्ब ७ करोड ६० लाख रुपैयाँ भुक्तानी भएको थियो। चालु आर्थिक वर्षको जेठसम्म क्यूआरबाट ५३ अर्ब ८८ करोड १० लाख रुपैयाँ भएको छ।
यसैगरी वालेटबाट हुने कारोबार ४५.७१ प्रतिशतले बढेको छ। गत आर्थिक वर्षको जेठसम्म वालेटबाट २० अर्ब १४ करोड ५० लाख रुपैयाँको कारोबार भएको चालु आर्थिक वर्षको जेठसम्म २९ अर्ब ३५ करोड ४० लाख रुपैयाँको कारोबार भएको छ।
पीएसओबाट हुने कारोबार पनि चालु आर्थिक वर्षको जेठसम्म बढेर ५ अर्ब ६३ करोड ३० लाख रुपैयाँ पुगेको छ। अघिल्लो वर्ष जेठसम्म पीएसओबाट ५ अर्ब ५० लाख रुपैयाँबराबरको कारोबार भएको थियो।
