काठमाडौं । सहकारी संस्थाहरुमा सञ्चालक बन्नका लागि सहकारी विभागले कठोर निर्देशन दिएका जारी गरेको छ। विभागले आज सबै सहकारी संघसंस्थाहरुका नाममा परिपत्र जारी गर्दै यस्तो निर्देशन दिएको हो।
सहकारी ऐन, २०७४ को दफा (४१) को उपदफा (५) मा कुनै एक व्यक्ति एकै समयमा एकमात्र सहकारी संस्थाको सञ्चालक हुन सक्ने व्यवस्था छ। सोही व्यवस्थालाई टेकेर विभागले यदि कुनै व्यक्ति दुई वा सोभन्दा बढी सहकारी संस्थाको सञ्चालक रहेको भए यो निर्देशन जारी भएको ३० दिनभित्र एउटामात्रै संस्थाको सञ्चालक पद कायम राखी अन्यत्रको त्याग्न निर्देशन दिएको छ। अन्यथा कानुनबमोजिम कारबाही प्रक्रिया अगाडि बढाइने विभागले चेतावनी दिएको छ।
यस सन्दर्भमा सहकारी संस्था भन्नाले संस्था वा संघ सम्झिनुपर्ने विभागले स्पष्ट पारेको छ। यो शब्दले सहकारी बैंकलाई समेत जनाउने विभागले प्रस्ट्याएको छ।
यसैगरी सञ्चालक भन्नाले सहकारी ऐनको दफा (४१) को उपदफा (१) बमोजिम सञ्चालक समितिको सदस्य सम्झनुपर्ने र यो शब्दले समितिको पदाधिकारीलाई समेत जनाउने विभागको भनाइ छ।
