काठमाडौं । मुलुकको व्यापार घाटा १३ खर्ब रुपैयाँ माथि रहेको देखिएको छ। भन्सार विभागले सार्वजनिक गरेको चालु आर्थिक वर्षको ११ महिना जेठसम्मको तथ्यांकले यस्तो देखाएको छ।
विभागको तथ्यांकअनुसार जेठसम्म मुलुकको व्यापार घाटा १३ खर्ब १४ अर्ब ५५ करोड रुपैयाँ रहेको छ। अघिल्लो वर्ष सोही अवधिसम्म व्यापार घाटा १३ खर्ब ३७ अर्ब ३९ करोड रुपैयाँ रहेको थियो। अघिल्लो वर्षको तुलनामा व्यापार घाटा १.७२ प्रतिशतले घटेको छ।
तथ्यांकअनुसार अघिल्लो वर्षको तुलनामा यो वर्ष आयात १.८४ प्रतिशतले घटेको छ। अघिल्लो वर्ष जेठसम्म १४ अर्ब ८० अर्ब ९८ करोड रुपैयाँको वस्तु आयात भएकोमा समीक्षा अवधिमा घटेर १४ अर्ब ५३ अर्ब ७० करोड रुपैयाँको भएको छ।
यसैगरी समीक्षा अवधिसम्म १ खर्ब ३९ अर्ब २६ करोड रुपैयाँ वस्तु निर्यात भएको छ। जुन अघिल्लो वर्षको यही अवधिसम्मको तुलनामा ३.०१ प्रतिशतले कम हो। अघिल्लो वर्ष यही अवधिसम्म १ खर्ब ४३ अर्ब ५८ करोड रुपैयाँ निर्यात भएको छ।
समीक्षा अवधिसम्म मुलुकको आयात–निर्यात अनुपात ८.७४ प्रतिशत रहेको छ। अघिल्लो वर्ष यही अवधिसम्म यस्तो अनुपात ८.८४ प्रतिशत थियो।
