काठमाडौं । बैंकिङ प्रणालीमा निक्षेप थपिने क्रम जारी नै रहेको छ। लगानीको माग भने सुस्त नै रहेको छ।
नेपाल राष्ट्र बैंकको पछिल्लो तथ्यांकअनुसार जेठ १८ गते एकैदिन बैंक तथा वित्तीय संस्थाहरुको निक्षेप ८ अर्ब रुपैयाँले बढेको छ। योसँगै बैंक तथा वित्तीय संस्थाहरुको कुल निक्षेप ६२ खर्ब २७ अर्ब रुपैयाँ पुगेको छ। अघिल्लो दिन जेठ १७ गतेसम्म बैंकहरुको कुल निक्षेप ६२ खर्ब १९ अर्ब रुपैयाँ थियो।
यो एक दिनमा वाणिज्य बैंकहरुको निक्षेप ७ अर्ब रुपैयाँले बढेको छ। अघिल्लो दिनसम्म वाणिज्य बैंकहरुको कुल निक्षेप ५५ खर्ब ४ अर्ब रुपैयाँ रहेकोमा जेठ १८ गते बढेर ५५ खर्ब ११ अर्ब रुपैयाँ पुगेको छ।
बैंकहरुमा कर्जाको माग भने सुस्त नै देखिएको छ। जेठ १७ गते बैंक तथा वित्तीय संस्थाको कुल कर्जा लगानी ५१ खर्ब २३ अर्ब रुपैयाँ रहेकोमा जेठ १८ गते पनि त्यति नै रहेको देखिन्छ।
निक्षेप बढ्दा बैंकहरुको औसत सीडी रेसियो जेठ १८ गते घटेर ८०.०८ प्रतिशतमा झरेको छ। अघिल्लो दिन सीडी रेसियो ८०.१७ प्रतिशत थियो। अन्तरबैंक ब्याजदर भने ३ प्रतिशत तल नै रहेको छ।
